Lung tla thin tih ziaawm tumin endiktu mithiamten rawtna siam

Lung tla thin tih ziaawm tumin
endiktu mithiamten rawtna siam
Mizoram sawrkar ruahmanin mithiamte chuan Ngaizel, Hlimen leh Lengpui-a lung tlak thinna lai chu enfiahin lung tla tih reh/ dan dan kawng dap a ni a. Rawtna hrang hrang an siam a ni.
Maccaferri Environmental Solutions Pvt Ltd assistant general manager Er Manthan Chauhan leh Council of Scientific & Industrial Research- Central Institute of Mining & Fuel Research (CSIR-CMIR) chief scientist Dr C Sawmliana chu Disaster Management & Rehabilitation minister Prof. Lalnilawma sawm angin Pukpui Lengpui, Ngaizel leh Hlimen leimin/ lung tlak thinna leh hmundang him lo lai an enfiah a, mipui tan him zawka siam dan an dap dawn a ni.
A hmuna an enfiah hnu ah DM&R minister ho hian an thukhawm a. Tarlan a nih danin, Ngaizel kham phei km 1.7 a thui chu lung tlak hlauhawmna a ni a, chu’ng zinga meter 405 chu hlauhawm zual – ‘very high hazard’ a nih bakah metre 740 dang pawh ‘vulnerable’ anga ngaih theih a ni. Chhinchhiah danin, 2015 September 24 leh 2025 May 1 inkar khan lung tla avangin lirthei chhia 26, mihring inhliam 9 leh nunna chan 3 an awm a ni.
Mithiamte hian, Ngaizel lung tlak thinna hmuna kham chu rawt zawl deuh (re-slopping), tui put awm nasa ven, thirlen rintlak tak hmanga tuama concrete-a phuh (gunite) theih dan an sawi a. Kham chunga chenna in engemawzata bawlhlawh leh tui chhe paihna mumal zawk siam leh lung kara thing zung lut tam tak suat pawh a tul tih sawi a ni.
Mithiam sawmte endik pui hian District Disaster Management Authority Aizawl, PWD, DM&R department, Geology & Mining department hotute bakah MZU-a geologists-te an tel.