Lungalhthei khur puakah mi 18 thi, Shah-a’n puih a inhuam

Union Home Minister Amit Shah-a chuan Ningania dan phal lova lungalhthei laih chhuahna khur siam ni ngeia hriata thil puaka mi 18 thihna thleng chungchangah Meghalaya Chief Minister Conrad Sangma chu biain a tul ang apianga puih a inhuam thu a hrilh.
Meghalaya-a East Jaintia Hills district-a sazu kua ang siam lungalhthei laih chhuahna khura Ningani chawhmaa thil puakah hian thawktu 18 vel thi an awm tawh a, tang pawh an la awm rin a ni.
Shah-a chuan chief minister hnenah hian chhanchhuah leh chhawmdawl hna thawhnaa tul ang apianga sorkar laipuiin a pui thei tih a hrilh niin ANI chuan a tar lang.
Thangsku khuaa chhiatna thlenna hmunah hian rescue team chuan mi zawn hna ngawrh takin an thawk nghal tih Director General of Police I Nongrang chuan a sawi a, an hna hmasaah dama la awmte awmna hmun hriat leh lak chhuah a nih thu a sawi.
Chhanchhuah hna thawh tawh chinah hian ruang 18 an hmu tawh tih bodies were recovered from the site, East Jaintia Hills Superintendent of Police Vikash Kumar chuan a sawi niin PTI chuan a tar lang.
Hliam tuar pakhat lak chhuah pawh Sutnga Primary Health Centre-a lak a nih hnuah enkawlna tha zawk dawng turin Shillong damdawi in panpui a ni.
Chhiatna thlenna hmun hi a kilkhawr hle a, chhanchhuah hna thawktuten a hmun thleng tur hian kawng chhe takah lirtheia an thui tak an kal a ngai niin Kumar-a chuan a sawi.
Chhiatna a thlen lai hian hna thawk engzat nge awm tih chiang taka hriat theih a ni lo va, thuneitute chuan dan phal lohva lungalhthei laih chhuahna hmun a nih avangin a hna thawk awm zat pawh hi hriat a harsa niin an sawi.
Prime Minister Narendra Modi-a chuan thite hi sorkar laipuiin Rs. nuai 2 theuhva a ral dawn thu leh hliam tuarte pawh Rs. 50,000-a kan an nih tur thu a puang.
Prime Minister’s Office chuan, “East Jaintia Hills, Meghalaya-a thil thleng chu a pawi tak zet a. An hmangaih tak tak suntute kan tawrhpui a. Hliam tuarte pawh rang taka dam leh turin duhsakna kan hlan,” tiin X-ah an tar lang.
Meghalaya Chief Minister Sangma pawhin thil thleng pawi a tih thu leh thil puak chu uluk thei ang bera chhuiin a thlen nawn tawh lohna turin hma an la dawn tih a sawi a. Dan bawhchhiaa lo che, hetiang thlen phahna an man chhuah chu na taka hrem a ni dawn tih a sawi bawk.
National Green Tribunal (NGT) chuan rat-hole coal mining an tih, sazu kua anga kaw hreuhva thil laih chhuahna kalpui leh science thiamna hmang tel lova thil laih chhuahna ang chi hi kum 2014 daih tawh khan Meghalaya-ah hian a khap a. Hetianga tih hian khuarel thil a tichhia a, a him lo va tih sawiin dan lova lungalhtheia sumdawnna khuahkhirhna tur a ni bawk tih an sawi.
Rat-hole mining an tih hi kaw pakhat atanga leiverh zim têtê kal darh, a san zawng pawh feet thum/li vel chauh, mi pakhat chauh leiverh/khur khata hna a thawh theihna hmun ang chi a ni.
Supreme Court pawhin hetiang khura thil laih chhuah hi khapin scientific tak leh khuarel humhim zawnga tih dan tur kalpui ang zel chauhva laih chhuah a phal a ni.
Sorkar laipuiin a chhinchhiah dan chuan kum 2012 atang khan Assam leh Meghalaya-ah hian dan lova siam rat-hole mining-a chhiatna thlengah mi 63 an thi tawh a ni.