Lunglei district-a govt middle school hoa zirlai ngah ber tlawh

Lunglei High Powered Committee (HPC) vice chairman V Malsawmtluanga chuan Nilaini khan Lunglei Electric Venga Govt JNM Model Middle School a tlawh a, an school dinhmun leh HPC suma building zauh hna thawh leh hmabak an thlir ho.
HPC vice chairman chuan sawrkar sikul chhuan tlak leh zirlai ngah chu a theih chin chinah theihtawp chhuahpui a inhuam tih a sawi a. Lungleia sawrkar sikul entawn tlak ber pawl, Govt JNM Model M/S a ngaihhlutzia lantir nan HPC Fund atangin an sikul building zauh leh thawmthat hna pawh thawk tura ruahman a ni tih a sawi a ni.
Govt JNM Model M/S hi 1969 January 16 khan mi thahnemngaite hmalaknaa din a ni a. Kum 1979-ah govt aided-a hlankai niin, kum 1985-ah govt deficit-ah, 2003 September 1-ah sawrkar sikul puitlinga hlankai (provincialised) niin, 2014 khan Model Middle School atan puan a ni. Tunah hian headmaster 1, teacher/ instructor 16 leh IV grade 1 awmin, zirlai 137 an awm a. Middle school a nih angin class V- VIII thleng zirna a awm. Lunglei district-a sawrkar middle school zingah zirlai ngah ber a ni mek.