Lunglei hmasawnna tam zawk Congress kutchhuak – MPCC

Lunglei hmasawnna tam zawk
Congress kutchhuak – MPCC
Mizoram pum ang leh Lunglei bikah hmasawnna tam zawk chu an sawrkar laia an kutchhuak a ni tih Congress thupuangtu Dr Lallianchhunga chuan a sawi.
MPCC Media Department chairman ni bawk Dr Lallianchhunga chuan Congress-in mipui duhsakna in Mizoramah sawrkar a lo siam tawh thin a, duhthusam ni vek lo mah se, Mizorama hmasawnna liantham tam zawk chu Congress sawrkar ruahman leh a tihhlawhtlin an ni deuh vek, tiin, Lungleiah pawh hmasawnna engemawzat chu Congress kutchhuak a ni a, tuna Lunglei khawpui hian chhanchhuaktu leh duat taka enkawltu a mamawh avangin, Municipal Council inthlanah phei chuan chief minister Pu Zoramthangaa hmaa engmah sawi ngam lo tur councillor atana thlanchhuah chu Lunglei mipuiin an ba lo, tih a sawi.
Mi thenkhatin sawrkar kal ta in engmah thawh nei lo angin sawi thin mah se, Congress sawrkar khan thil tamtak a tih atanga langsar thenkhat zingah, district dang neih ve loh High Power Committee dinin, hei hi Lunglei hamsawnna tur a din, mahnia inrelbawl thei a ni a, a hlawkna chu Lunglei mipuiin an hria tih a sawi.
Lunglei by pass road sialna tur cheng nuai 900 dah leh suvey pawh zawh vek tawh chu Pu Zoramthanga sawrkarin hmang zui duh loin survey-na pawhin a daih lo, tiin sum awmsa chu thil dangah an hmang daih tih Congress thupuangtu hian a sawi. “Kum 4 chhung khan bawngtuthlawh vawikhat pawh an chek duh loa, hma an la zui duh lo kha Lunglei mipui hmusitna lian tak a ni,” a ti.
Congress sawrkarin SYS Football Academy hlawhtling tak a din hmangin footballer tha tak tak chherchhuah an nih thu te, Thuamluaia Mualah phullem phah niin, Lena Stadium sak leh infiamna hmunhma engemawzat siam hman a nih thu te; Mizorama Convention Centre hmasaber pawh 2016 September 16-a hawn a nih thu te, Lunglei mipui chawmtu Pialthleng atanga tui lakna chu Congress hunlai ami a nih thu leh ATL Road pawh Congress bul tan a nih thu te a sawi a ni.
Covid len laia chhimlam mipui tana RT PCR khawl peh, MNF sawrkarin a bun loh dan ringawtah pawh, thih leh dam kara Lunglei mipuiin an koh eih phak loh MNF sawrkar chu vote nawn an ba lo tih Dr Lallianchhunga hian a sawi. Lunglei mipui tamtakin an duhlo chungin, an sawrkar laia an din nia chhal duh vang maiin MNF sawrkarin municipal chu Lunglei mipui a barhlui tih a sawi bawk.
ZPM chu midang thatna hmu duh miah lo, ZNP an nih lai atang tawha mipuiin rorelna an pek duhloh te an ni, tiin, ZPM leader Pu Lalduhoma chu officer eirukna a ziaawm, ti duh, eiruka do tak tak ngam lo tur an nih avangin rorelna pek tlak an ni lo a. Congress candidate te chu tha ber leh fel ber ni lo mah se, Lunglei khawpui chhan tur leh enkawl tura penchhuak an nih avangin vote turin Lunglei mipui a sawm tih a sawi a ni.