Raltlan 9488 temporary ID pe tawh

Raltlan 9488 temporary ID pe tawh
Myanmar buaina avanga sahimna zawnga Champhai district-a lut raltlan 10226 chhinchhiah zingah 9488 chu Mizoram sawrkar ruahman angin temporary identity card pek an ni tawh.
Adventist Development and Relief Agency (ADRA) India kaltlanga Myanmar ram buai avanga raltlante chhawmdawl dan tur project, ‘Protection and Humanitarian Assistance to new arrivals from Myanmar in Mizoram 2023’ chungchang ngaihtuahin Thawhlehni khan Champhai District Level Committee on Myanmar Refugees leh ADRA hotute an inrawnkhawm.
Thutkhawma report danin, kumin March 20 thleng khan Champhai district-a khua 47 ah raltlan 10226 an awm tling tawh a; puitling mipa 3033 leh hmeichhia 3264 bakah naupang 3929 an ni. Raltlan awmna tura sak relief camp 34 a awm a; 13 hi kum 2021-a siam niin, nikum khan 21 sak belh a ni. Raltlan zinga 2643 chu relief camp-ah chengin, 7583 chu relief camp pawn hmun dangah an cheng thung
Raltlan zawng zawng profiling zawhfel a ni tawh a; heng zinga 9488 te temporary ID pek chhuah tawh niin, 738 tan buaipui mek a ni. Raltlante pual dan leh hrai inzirtirna camp tum 12 buatsaih a ni tawh bawk.
ADRA hi chhiatrupna emaw emergency thlen thulha tanpui ngaite tanpuia chhawmdawlna pe tura din niin, India-ah chuan Gurgaon Haryana-ah hmunpui a nei. Khawvel pumah chuan Maryland USA ah hmunpui a nei. Champhai district bikah chuan, nikum khan thla thum chhung hma an lak zet hnu ah Mizoram chhimlam district 4-ah an insawn a. Kumin hian hak zauhin hma an lak tawhna district 4 bakah district thar 2 – Champhai leh Aizawl district-a raltlante chhawmdawl hna an thawk dawn a; tunhnaia raltlan tharte chu an hmalakna hmasa tura an ruahman a ni. Thla 12 chhung atan project an siam a. Hmalakna tur an tarlan zingah, ei tur leh nitin khawsak kawnga mamawh pek, hriselna lam, drop in centre din, sikul naupangte mamawh pek, children friendly space siam leh a dangte a tel.
District bawrhsap James Lalrinchhana chuan thenawm ram buai avanga raltlante chhawmdawl kawngah theihtawp chhuaha tanho a ni chu lawmawm a tih thu a sawi a. Mizorama raltlan ngah ber district an nih avangin tan lak nasat zual a ngai a, raltlante pawhin India ram dan leh hrai bakah inkaihhruaina siamte tha taka an zawm a tul tih a sawi.
Village Level Committee on Myanmar Refugees chu mahni huamchhung theuha raltlan awmte hrechiang a, inkaihhruaina duan an zawm em tih chîk ngun turin District Level Committee hian a ngen a. Raltlante chu hriatthiamna avanga awm an nih angin, ram dan zamte ngaipawimawh fo tur leh dan pela che lo tura beisei an nih thu sawi a ni. Raltlan leh khawtual mite inkarah inhriatthiam lohna a awm loh nan leh, inkaihhruaina siamte tha taka zawm a nih theih nan District leh Village Level Committee-te thawhho that a tul tih sawi a ni.