Lunglei Municipal Council inthlan

Hripui leng avang te pawh a ni thei ang a, Mizoram state cabinet-in Lunglei Municipal Council din a remtih atanga kum khat leh thla li hnuah Lunglei Municipal Council inthlan hmasa ber chu vawiin March ni 29, 2023 hian neih a lo ni ta a. Hun rei tak ata tawh Lunglei mipuiten an lo thlir thin, a taka tihhlawhtlin a lo ni ta hi a lawmawm a, hei hi Mizoram tana hmasawnna mellung pawimawh zinga pakhatah a chhiar theih awm e.
State dang nena inkhaikhin ralah chuan Mizoramin Municipality kan sengluhna hi la rei lo tak, kum 15 awrh chauh a la ni. Aizawl Municipal Corporation pawh hi a tirah chuan ‘Council’ atanga bul tan a ni a; population a lo len tak avangin Corporation huangah seng luh theih a lo ni a. Lunglei pawh hi population azirin nakina Corporation-a la hlankai hmabak tho a ni.
Aizawl khawpui pawh hian, AMC a din tak hnu hian kawng hrang hrangin hmasawnna hmel thar a hmu mek a, khawpui hmel pawh a danglam chak hle. Lunglei mipui pawhin, khawpui hmasawnna atana tax an pek tlingkhawm hmanga hmasawnna hnathawh chak tak an hmuh theih ngei a beiseiawm hle a ni.
Lunglei Municipal Council inthlan hi MLA inthlan kuma neih a nih avang hian boruak a tang hle a. Mizorama political party lawk zual pathum MNF, Congress leh ZPM ten seat awm zawng zawng (11) an chuh kim vek a, BJP-in seat 9 a chuh bawk a. Tun tuma inthlan result hian kumin kumtawp lama MLA inthlan turah awmzia thui tak a hril thei tura ngaih a nih avangin party hrang hrang campaign thawm pawh a ring hle a; thahnem pawh an ngai tlang hle.
Election campaign danah pawh tunhma ai kha chuan hma kan sawn leh hret niin a lang. Mimal inbeihna tawngkam dengkhawng leh ngaihthlak nuam lo ang kha tun tumah hian a lêng nasa lo niin a lang. Hetih lai hian, social media kaltlanga Zoram mipui beng fahtu tam zawk chu Lunglei khawpui hmasawnna tur lam chhawp chhuaka candidate-te thu leh hla ngaihthlak aiin, party dinhmun insawi thatsiakna lamin social media lamah hmun a chang tam zawk niin a lang.