LMC inthlanah vote zaa 72 chuang tla
Lunglei Municipal Council inthlan vawi khatna, March 29-a vote thlak chu boruak muanawm tak hnuaia neih zawh niin, vote thlak theih tawp hun – tlai dar 4.00 thlenga tla hi voters awm zat atangin za zelah 72.64 a ni.
Inthlanah hian 2022 October 14-a tlangzarh Lunglei Municipal Council final electoral roll hman a ni a. Vote nei 40548 awmin mipa 19123 leh hmeichhia 21245 an ni. Vote thlak theih hun, tlai dar 4.00 thlenga vote tla chhinchhiah hi 29456 niin, mipa 13670 leh hmeichhia 15786 an ni a. Ward No.XI (Lungpuizawl leh Zobawk) ah vote tla tha berin zaa 80.62 a tla a; he chanchin buatsaih laia vote tlak chhiatna ber chu Ward No.X (Sethlun, Luangmual, Theiriat & Hrangchalkawn) a ni a, zaa 67.20 a tla a ni.
Lunglei atanga thudawn danin, inthlan hi boruak muanawm tak hnuaia neih a ni a, dan leh thupek kaihhnawih buaina chhuak a awm lo.
Candidate-ten nomination paper an thehluh atanga a lan danin, candidate zinga naupang ber chu kum 27 a ni a, a upa ber chu kum 65 a ni thung. Chawhrualin kum 40 atanga 50 inkar an tam ber.
LMC inthlan vote tlate hi karleh Thawhtanni – April 3-ah Saikuti Hall-ah chhiar a ni anga, inthlan kaihhnawih thil zawng zawng chu April 6-a zawhfel vek tura tih a ni.
Hetihlai hian Lunglei Municipal Council inthlana candidate-te sum sen belhkhawmah ZPM party chu seng tam ber an ni a. Candidate-te sum sen dan endik vawi thumna leh a tawpna chu Nilaini khan Accounts & Treasury department-in an kalpui a. Lunglei Treasury officer Vanlalrosiama Ralte chuan Ward I-VI endikin, Audit & Accounts officer PC Lalrammuanpuia’n Ward VII-XI te a endik thung.
Candidate zinga campaign na’na sum seng tam ber chu INC candidate Elizabeth Vaninmawii, Ward No.VIII ani a, Rs 87530 a seng. Ward No.VIII (8) MNF candidate C Lalrindiki’n Rs. 73175 sengin a dawt a, Ward No.IX ZPM candidate Zorinsanga Hmar in Rs 71620 sengin pathumna a ni.
Candidate zinga campaign na’na sum seng tlem ber chu Ward No.V BJP candidate Lalmuanpuii a ni a, Rs. 6840 a hmang a ni.
Political party hrang hrang candidate-te sum senso belhkhawm a tam dan indawt chu: ZPM – Rs 4,87,292; MNF – Rs 4,77,625; INC – Rs. 4,22,466; BJP – Rs 1,69,390 a ni.
-- Advertisement --
Vote tlak dan
Ward No. Vote tla %age
I 77.42
(Pukpui & Zotlang)
II (Reseved) 75.41
(Serkawn & Zohnuai)
III 71.61
(Bazar & College Veng)
IV 70.39
(Venglai & Venghlun)
V (reserve) 71.38
(Rahsiveng, Saizaikawn,
Hauruang)
VI 72.05
(Electric Veng)
VII 70.14
(Chanmari)
VIII (reserve) 72.06
(Ramthar, Farm Veng)
IX 74.02
(Lunglawn, Salem)
X (reserve) 67.20
XI 80.62