Lunglei tui lakna tur zo hnai

Lunglei khawpui tui lakna, Greater Lunglei Water Supply Scheme (GLWSS) hmun Pialthleng leh Tlawng lui chu Nilaini khan PHE minister Prof. Lalnilawma’n a tlawh a, Lunglei khawpuiin tui hnianghnar zawk a hmuh theihnana AMRUT 2.0 leh SASCI hnuaia GLWSS tihchangtlun hna thawh mek a enfiah.
Minister chuan Tlawng lui khuah hna zawh fel thawkhat a ni ta chu Lungleiin tui lama harsatna a tawh thin tam tak sutkian a ni dawn tih a sawi a. PHED-a thawktute leh contractor chungah leh hnathawh laia hrethiam taka dawh hram hramtu Lunglei mipui chungah an lawm tih a sawi.
Hetih rual hian tui semna hmanrua leh a dahkhawlna lam duh anga inpeihfel a la nih loh avanga mipui beisei anga tui hnianghnar zawka sem theih a la ni lo chu pawi a tih thu sawiin, mipuiin hnianghnar zawka tui an hmuh theihnan hmachhawp hrang hrang a awm a, hma lak zel a ni tih a sawi bawk.
GLWSS tui lakna Tlawng luia tuikhuah (Gravity Concrete Impounding Dam) siam hna hi cheng vaibelchhe 4.7 sengin HS Construction Pvt Ltd Aizawl-in thawkin, tuikhuah hi metre 13-a sang a ni. A hnar lamah km. 1.5-a thui chimin, tui luan liamna spillway tha taka siam a ni. Tuikhuahna chungah hian lei siam tum a ni a. Tui hi a khuahnaah a tling khat a nih chuan litre maktaduai 240 tling thei tura chhut a ni.
Tuna Lunglei tui pump mekna – Greater Lunglei Water Supply Scheme hi 1995 November 22-a hman tan niin, kum 30 chuanga upa a ni tawh. GLWSS tihchangtlunna tur hian thuang hnihin hma lak a ni a. Kum 2054 (kum 30 hnu) thlenga mihring 111827 chawm thei tur, Tlawng leh Pialthleng lui atanga tui lakna tur ruahmanna chu SASCI 2024- 2025 sum vaibelchhe 55.7 sengin hma lak mek a ni. AMRUT 2.0 hnuaiah vbch. 9.9778 sengin hna thawh mek a ni a, Tlawng lui khuah hna hi he project hnuaiah hian thawh a ni.