Lungleiah dan loa sumdawng 50 chuang

Lungleiah dan loa sumdawng hnamdang leh hnamdang hnena Mizo hming hawhtu mi 50 chuang hmuhchhuah an ni.
YMA Sub-Headquarters Lunglei chuan Mizo hming hawha hnamdang sumdawng leh hnamdang dan loa sumdawng dap chhuah runpui neiin, hnamdang dan loa sumdawng 34 leh hnamdang hnena Mizo hming hawhtirtu nia lang 18 hmuhchhuah a ni.
Ram leh hnam himna leh humhalhna atan, Zofate chu chimrala an awm lohna turin, hnamdang hnena Mizo hming hawhtirtu nia lang mi 18 chu YMA Sub-Hqrs Lunglei hian Zirtawpni khan lengah sawmin an inkawm a. Sumdawnna chungchanga dan inhrilhhriat niin, hnamdangte nena sumdawn tlannaah, ram leh hnam tana him lo leh inchimral theihna kawng awlsam a inhawn thin avangin, chumi himna tur ngaihtuah a, ram leh hnam hmelma ni loa, khua leh tui tha ni chunga dan anga sumdawnna kalpui turin a sawm.