Lungleiah silai leh a mu man

Lungleiah silai leh a mu man
Lunglei Police chuan dan kalha tawlhruk silai leh a mu thahnem tak an man.
Lunglei Police leh Excise & Narcotics Department chuan inthlanpui kaihhnawiha ruihtheih thil tawlhruk venga an duty-naah Nilaini zing dar 2.30 vela Thenzawl lam atanga Lungleia lut Maruti Alto car MZ-01 S 3210 chu ringhlelin District Special Branch an hriattir a, an ni hian Lunglei Bazar Veng thlen dawn Lungchhe Ngaw ah lo tidingin, lirthei an dapnaah an thil phurh – AK 47 pahnih, M4 Carbine panga leh a magazine 20 bakah silaimu – 7.62MM mu 504, 5.56MM mu 4675 an man a. Hei bakah hian he car-a chuangte kut atang hian sumfai Rs. 49550, ID cards, ATM cards, sim card leh mobile phone 5 an man.
He lirtheia chuang Roni Chakma (45) Dhalai Tripura, Anirban Chakma (34) Adubangasora Lawngtlai district leh Ribeng (24) Tipperaghat Lunglei district nia insawite chu man an ni a, thubuai siamsak an ni. Tun tuma silai leh a mu mante hi Mizorama tum khata silai leh a mu man tam ber pawl zing ami nia hriat a ni.