LZ Juice buhfai supply retailer-ten an la duh lo – MNF Thalai

LZ Juice buhfai supply
retailer-ten an la duh lo
– MNF Thalai
Mizoram sawrkarin buhfai supply tura mimal supplier a thlan LJ Juice-in buhfai an supply zingah eng grade nge pawh hriat loh a awm a, retailer-ten an la duh lo niin MNF Thalai chuan an sawi. Mipuiah buhfai hninghnar pe turin an phut tih an sawi bawk.
MNF Thalai Aizawl East-I Block thuchhuak chuan, Mizoram buhfai mamawh hi Food Corporation of India atangin a zatve vel a tlawma lei leh dawn a ni a. A dang zawng chu open market atangin contractor LZ Juice-in a leikhawm tih a sawi a. Tunah hian Aizawlah thla chawhnu lamah buhfai pek chhuah tan chauh a ni a, retailer thenkhata buhfai an sem mek chu mipuiin an inchan lo hle a. Chutih laiin, Zuangtui kudamah buhfai a awm tawh loa, kudam an tlawhnaah truck pakhat chiah a thleng tih a sawi.
‘Kudam chhungah hian LZ Juice buhfai supply, bag tial rekruk, eng grade nge a nih tih pawh hriat loh awmin, heng buhfai, grade ‘C’ ni awm tak hi retailer tumahin an phurh chhuak duh lo nia sawi a ni,’ a ti.
FCI hotute an biaknaah, FCI chuan thlatir atangin RO pawh an siam thei reng a, engmah an hnena lo thleng an tikhawtlai ngai lo tih an hrilh thu sawiin, Mizoram sawrkarin open market atanga buhfai tha, grade-A duh khawp a lei thei lo a nih chuan, certified thlap grade-A buhfai, open market-a an leina aia tlawmin an lei tir reng thei tih an lo hrilh thu MNF Thalai hian an sawi.
Sawrkarin FCI hi mawhpuh deuh mah se, FCI chuan December thla tir atangin anmahni lamah harsatna an nei loa, Lunglei mamawh phei chu January thla tla tur an tifel sa deuh nual tawh zawk tih an hrilh thu a sawi bawk.
‘Sawrkar hian buhfai man a leta a tih to hnu ah pawh, buhfai leina tur sum a nei lo fo niin a hriat a, thla tawp dawn lama buhfai a sem thei chauh zel a, mipui duh khawp buhfai an chhek khawl hleithei ta lo. Kalphung thar sawrkar hian, kalphung thar ringawt niloin, kalphung tha leh dik hmangin min hruai zawk teh se,’ thuchhuah chuan a ti.