Jacinda Ardern-in a ban tur thu puang

Jacinda Ardern chuan thla tharah New Zealand prime minister a nihna atanga a ban tur thu a sawi a, hmahruai zel turin tha a neih tawh loh thu a sawi.

Ardern chuan kum ruk hruaitu lu a nih chhunga a hautak dan sawi bawkin Labour Party leader a nihna hi 7 February hmain a bansan dawn a. Amah thlaktu tur vote laa zawn nghal a ni ang.
New Zealand hian 14 October ah inthlanpui a hmachhawn dawn a ni. Kum 42-a upa Ardern hian hun eng emaw ti chhung chu a hma lam hun tur tichiang turin a inngaihtuah a ni.

“Hruaitu nih chhunzawm zel theih ka inbeisei a, mahse, mahse, vanduaithlak takin ka thei lo a ni, ka ni lui zel a nih chuan New Zealand tan a tha dawn lo,” tiin a sawi.
Ardern hi kum 2017-a prime minister atana thlan tlin a nih khan kum 37 mi chauh niin khawvel ram hruaitu lawk naupang ber a ni a.

A kum leh lawkah world leader zinga hruaitu lawk ni chunga office luah laia nau hring pahnihna a ni bawk.

Covid-19 pandemic len laiin New Zealand kaihruaitu niin, a hun laiin Christchurch mosque beihna thlengin White Island tlangkang a irhchhuak bawk a.
“Ral muan laia ram hruai leh, harsatna tawh laia ram hruai a inang lo,” tiin a sawi nghe nghe a.

“Heng thil thlengte hi a nasa hlawm hle a, a rit em em a. Ram kaihhruai a har hle tih rilru put hun a awm meuh lo,” tiin a sawi.

Ardern hian kum 2020 khan Labour Party chu inthlanah nasa takin a chakpui a, mahse, ram chhunga policy a kalpuiah tun hnaiah a larna a tlahniam thung.

Ardern chuan a banna chhan tur chu Labour party-in chakna a chang zo dawn lo nia a ngaih vang ni lovin chakna a chang dawna a ngaih vang zawk tiin a sawi a. “Harsatna te hmachhawn turin mithar kan mamawh zawk a ni,” tiin a sawi.

Deputy leader Grant Robertson chuan hruaitu nih tuma a beih dawn loh thu a sawi nghal bawk a. Party room-ah candidate pakhatin vote hmun thuma thena hmun hnih a hmu zo lo a nih chuan hruaitu tur chu Labour’s lay membership te thlan turin dah a ni ang.

Australian Prime Minister Anthony Albanese chuan Ardern chu fakin, fing, chak leh hriatthiamna nei chunga ram hruai hna kalpui a ti a. “New Zealand tana theihtawp chhuahtu a ni a, mi tam tak te ngaihdan leh ka thian tha a ni,” tiin a sawi.

Ardern chuan a sorkar laiin climate change, social housing leh child poverty tihrehna lama an thawhna chu chhuanawm a tih zingah a tel a. Mahse, hre reng tura a duhna ber chu New Zealander ten ‘theihtawpa ngilnei taka awm tum tiin mi hre reng se’ tiin a sawi.

“New Zealanders te hian ngilnei, mahse chak si, hriatthiamna nei mahse a huna ri thak thei, beisei neia mahse thlurbing neiah min hre reng se ka duh a. Hruaitu a hun taka insaseng theiah min ngai se,” tiin a sawi.