Madrid-in Vinicius thlunbeh tum zui zel

Kum 2018-a an lakluh Vinicius Junior khan Real Madrid-a hlawh tam zawk lak duhin contract thar an zawrh chu a hnial char char a, Bernabeu kawngkapui rap zawnga pen erawh ngam chiah si loin offer thar a thlir a; a chhuak ang tih hlau Spanish giants pawhin hlawh thar tur san leh chungin an dawr tha leh mek.
Brazil winger hian a contract neih laiah kum khat bak hun a nei ta lo a, sumtuakna’na an hralhchhuak vat lo a nih rau rau chuan free transfer-a an chhuahtir mai a ngaih palh lohna’n inremna thar an ziahpui vat a ngai tawh a; indawrna hmasaah an hlawhtling mai lo a, a hlawh tur san chungin contract hmui zawk an zawrh leh mek a ni.
He boruakah hian kum 26-a upa, vanglai hmang mek Brazilian hi English champion Arsenal chuan England-a hruailuh an lo tum ve mek bawk a, Vinicius-a hma hun sawi mai theih a la ni rih lo.
He thu buatsaih lai thlengin Real hian thaw dep dep chungin Vinicius-a thutlukna an la nghak mek a; hetih lai hian head coach atana an hruaikirleh tak Jose Mourinho telin senior manager-te ngaih erawh a tha hle niin an sawi!
Hlawh sang zawk nena an dawrna hi a hnawl leh a nih chuan Arsenal tan Vinicius sengluh tum chu hnip hnuih tawh tura ngaih a ni!
Kum thum kalta khan Vinicius hian kum 2027 thleng Real-a cham leh turin a contract neih lai a lo pawtsei tawh a; a vawi hnihna atana indawrna erawh tunhnai thla 18 chhung hian a hlawhtling mai thei ta hlek lo a, a hlawh phut hi a tam lutuk deuh nge maw ni dawn ni!?
Tun Thawhtanni mai khan Brazil tana World Cup campaign zawh chawlh hmanna hmun atanga kirin club lamah pre-season training session a zawm ta phawt a, medical check pawh a paltlang leh tawh a ni.
Inelna hrang hranga Real Madrid tana game 375 a khelh tawh atangin Vinicius hian goal 128 lai a tilut tling tawh a, Madrid tlarhma lama a thawhhlawk tiat chiah hian hlawh leh hamthatna dangah pawh Los Blancos top star nih phu ve tawhin a inngai a, chu tak chu contract thar ziah mai an la puitlin theih loh chhan a ni!
Chutih laiin an president Florentino Perez-a hnuaiah Real hian an mi chhawrte hlawh pek (salary structure) chungchangah kalphung nghet leh khauh tak an kalpui ve bawk si a, pet goal mawi deuh tuka ‘hlawh san ang aw’ ti mai mai lo president uapna hnuaiah Brazil international duhdan hi a la tlang hlei thei bik lo a ni ber!
Vinicius pawh hian a club vawn lai thlah mai chu a chak bik lo a, vantlang hriatah pawh Real chu ‘the club of my dreams’ tiin a lo sawi hial tawh a, kum tam tak la cham chhunzawm zel a duh thu a sawi bawk avangin a hlawh beisei zat ngaichang hian English-ho dawrna pawh a la uksak tak tak thei bik lo a nih hmel!
Arsenal lahin he Brazilian mihang hi an left-wing target pui ber a nih thu an sawi ve reng a, mahse, Real Madrid hlawh pek ang zat hi an pe thei kher ang em a hriat loh a, tuna player-in a club vawn laia a beisei ang zat u daih hian thlem ta se a bawrhsaiabe zaih mai thei!