Thupha chawi mah se president nih zel tum Infantino

Morocco rama management board member-te meeting a neihpui hnuah Fifa president Gianni Infantino chuan mimal sumdawngte hnena world cup chanpual hralh then a tum chungchanga a tihsual pawmin thupha a chawi a, Fifa president nihna erawh bansan a tum loh thu leh nakkum president thar thlan hunah pawh chuh leh a tum thu a nemnghet.
Fifa chhungkuaa eirukna leh thamna a rik chhuah hluai hnuah Infantino hi kum 2016 khan a vawikhatna’n Fifa president atan thlanchhuah a ni a; a kawng a tluang viau nain kumin world cup lai khan Argentina tan lutuka puhna avang leh tournament thlengtu pakhat USA president hlau leh tlawn lutuka puh a nih avangin sawisep a kai a; Fifa tana sum tam zawk hmuh inbeiseina niawm tak avanga private investor-te hnena world cup chanpual hralh then a tum avangin a hmingchhe zual ta a ni.
He a rawtna maksak tak avang hian kumin world cup laia a laka demna ri chhuak nuai nuai kha a puak keh ta a ni ber!
Asia, Europe leh CONCACAF lamin Gianni Infantino laka rinna an neih tawh loh thu leh bang tura an duh thu an auchhuahpui hnuah Nilaini khan Infantino hian Morocco khawpui Rabat-a Fifa Africa office-ah Fifa mi pawimawh (management board member)-te meeting a neihpui a; darkar li awh he meeting an zawh rualin Infantino chuan Fifa Forward Enterprise (FFE) tih hming vuaha world cup chanpual hralh tumna a neih avang khan thupha a chawi a, Fifa president nihna erawh chelh zui zel a tum thu a tarlang tel.
FFE rawtna avang khan European football governing body Uefa chuan thuchhuah siamin, Infantino laka rinna an nghah ngam tawh loh thu leh FFE rawtna chu puanhnuai thil, tunhma lama Fifa kalphung hlui leh mi tlemte chauhin an kalpui thin langtlang lo zeta thiltihna a nih thu an sawi.
President rawtna kha Fifa chhungkua zingah ngei ngei pawh sawiseltu an lawr tuam tuam a, chu’ng zingah chuan Nilaini meeting-a tel Fifa secretary general Mattias Grafstrom chu a langsar pawl niin, ani hian Thawhlehni khan Fifa staff-te hnenah lehkha (internal memo) thawnin, an hun tawn mek chu a lungchhiatthlak thu leh pawmzam theih loh hmalakna a indawt chhoh zut thu a ziak!
Nilaini meeting zawhah erawh Grafstrom leh management board lam chuan thuchhuah intawm siamin, Infantino president nihnaah full support an pe tih an tarlang.
Infantino leh Grafstrom-te hming ziah hnan lehkha tihchhuah tharah chuan Fifa vice-president hrang hrangte bakah council leh member association 211-te hnena tihsual chunga thupha chawina ziahlan a ni a, khati ang thil kha a thleng tawh lo ang tih an tiam bawk.
Infantino khan FFE tih hming a vuah behchhana private investment atana world cup chanpual phalrai pawmpuitu association zawng zawngte chu US dollar maktaduai 40 (£30m) an dawn tur thu a tiam a; private investor-te hnena chanpual hralh tur a tih zingah hian men’s and women’s world cup a tel.
Development fund hming vuaha member association-te sum hmuh tur tihpun chiam a tiam takah khan sum duh ve ta reng reng leh indaih lo kumhlun African ram panga lai chuan Fifa president rawtna an thlawp thu an lo puangzar hmanhmawh a!
Nilaini meeting zawha Fifa thuchhuah chuan ngaihdam an dil nasa mai a, FFE rawtna kha tihpalh a nih thu bakah Fifa council leh member association-te huap zo ve lo leh mi tlemte duhdan anga thil kalpui anga ngaih theiha thil a kal kha pawi an tih thu tarlan a ni a, kha ti lo zawnga kalpui tur a nih thu an sawi chul mai!
He thuchhuah hian a hun hmaa rawtna tih leak out a nih hnu khan tihsual a awm tih pawm nghal a nih thu tarlan tel a ni.
July ni 28 khan Times chanchinbu chuan Infantino ruahmanna siam hi an tichhuak a, hei hi he thu rawn irhchhuahna hmasaber a ni.
Times chanchinbu hian chanchin dang bengverh zet pawh tichhuak telin, tah chuan Fifa president an thlawp that manah Morocco chu 2030 World Cup final thlen (host) an tiam niin an ziak a, hei hi Fifa chuan a pha thung.
Nilaini meeting zawha an president ngaihdam dilna an tihchhuah rualin Fifa chuan an pawl inpumkhatna tichhe tura beihna reng reng an enliam mai mai dawn lo tih an tarlang tel a, Fifa hmingchhiatna thlen thei leh an thawhhona tikeh thei laka invenna atan eng hmanrua pawh an hmang hreh dawn lo tih an sawi!
Ti chuan, kum 56 mi Infantino hian sawiselna leh bang tura nawrna karah a tum lina atana president nih leh tumin campaign rusum a thlak leh mup mup tawh a; amah khing duh tan kumin November ni 18 thleng hming pek theih niin, president thlan hun hi nakkum March thla Morocco rama Fifa Congress (inkhawmpui)-ah a ni ang.
Fifa president ni tur hian Fifa member 211 atanga vote 106 tal hmuh tlin a ngai dawn a ni.
Member 55 neitu Europe (Uefa) lam chuan Infantino hi an vote lo deuh vek mai ang em tih zawhna a piang a; Asia leh Comcacaf nen khan FFE plan avangin ‘vote of no confidence’ hmanga Infantino paihthlak hial an duh kha a ni a, mahse, Fifa president hian a ruahmanna suta ngaihdam a dil zui hnuah an ngaihdan sawhsawnin president tanglai hi an vote leh mai ang em hriat theih a ni rih lo.
Tunhnaiah Egypt, Morocco, Niger, Mauritania, DR Congo leh Philippines-in Infantino an thlawp thu puangin, 64-team World Cup a sawimawi bawk avangte hian thlawptu a neih belh zel dawn em kan thlir ang.