Madrid Open-ah Alcaraz kal zel

Madrid Open-ah Alcaraz kal zel
Defending champion Carlos Alcaraz chuan Madrid khuaa a title kawl lai humhim turin kawng dik a zawh zel a, Thawhlehni khan nikum final-a a hneh hnu Alexander Zverev laka 6-1 6-2 hnehna nuamsa sualchhuak lehin Madrid Open quarter-finals a lut a; inkhel dangah rin loh takin Russian player Daniil Medvedev a tlawm thung.
German player Zverev lakah top seed Alcaraz chuan hneh taka inkhel thunun chungin a thiam pariat zingah a inhlangkai a, Spaniard rawlthar kum 19 mi lek hian semi-final luh inchuh match pakhatah fifth seed Andrey Rublev vawtlatu Karen Khachanov a hmachhawn zui leh.
US Open champion Alcaraz hian chawlhkar hnih kalta mai khan Barcelona khuaah title hlawhchhuak tawhin, Madrid lamah pawh a chetthat a chhunzawm kal mek a, tun clay season-ah hian chak hnem ber niin, Thawhlehnia German a hneh kha he leilung bik season kal laia a vawi 16 chakna lai a ni tawh.
Tualchhung tlangval tan hlawh leh beiseiawm ber ni leh mek Alcaraz laka che leh thei lo Zverev kha nikum French Open khelh laia a kheimit hliam serious tak atang khan ngai a la awh hlei thei lo a, chu chuan kumin bik match 28 a khelh tawha vawihnih chiah la tlawm Spaniard lakah pawh tan a khawh nattir thei lo niin a lang.
Inkhel dangah Russian 10th seed Khachanov chuan a chipui chetha tluang tak Rublev laka 7-6 (10-8) 6-4 hnehna changin Alcaraz a nghak.
Seeded second ni chunga Madrid tournament lian khel Medvedev pawh a chipui Russian ve bawk Aslan Karatsev chuan 7-6 (7-1) 6-4-in a hneh a, beisei loh result a ni.
World number three Medvedev hi inkhel entu mipuiin first-set tie-break an khelh laiin an ‘boo’ khum chiam a, chumi avanga lungawi loin a chair lam a pan zet a, chair umpire-in khelh zawm tura a fuih hnuah court a rap leh a, a chefuh ta chuang lo a ni.
Arantxa Sanchez Stadium-a a hneh loh Karatsev kha world ranking-a 121-na daih niin, Chinese history-maker ni chho ta mek Zhang Zhizhen lakah fiahna hautak dang a hmachhawn zui leh.
Nikum October thla maia Chinese mipa zinga world top 100 luah hmasaber Zhang-a hian Madrid khuaah a chetthat chhunzawm zelin, he tournament hmaa Masters 1000 match hnehna la chang ngai lo khan Madrid Open-ah rin aia thui daih a thleng ta a, a game hnuhnung berah 3-6 7-6 (7-5) 7-6 (10-8)-a American world number 10 Taylor Fritz hneh lehin quarter-final hial a thleng ta a, a hmain world number 27 Denis Shapovalov leh 13th-ranked British number one Cameron Norrie a lo vawtla tawh bawk.
Tun tournament kal laia a career-a a vawikhatna’n top-10 ranked player hneh ve ta Russian kum 26 mi hi Chinese player zinga ATP Masters 1000 quarter-final thleng hmasaber a ni.
Madrid Open women’s draw lamah Belarusian second seed Aryna Sabalenka leh Greek ninth seed Maria Sakkari chu semi-final pakhatah intumin, he hmun thleng turin Sabalenka hian unseeded Egyptian Mayar Sherif lakah 2-6 6-2 6-1 hnehna a chang a; Sakkari hian quarter-final dangah Romanian Irina-Camelia Begu chu 6-7 (3-7) 6-4 6-2-in a paltlang a, a vawikhatna atan Madrid-ah last four a lut.
World number one Iga Swiatek leh third seed Jessica Pegula-te’n Petra Martic leh Veronika Kudermetova anhmachhawn result erawh tarlan hman a ni ta lo.