Malaysia-in Myanmar raltlan 10,000 chuan thawn haw tawh
Malaysian Prime Minister Anwar Ibrahim-a chuan mihring dikna chanvo humhalhtute leh UN refugee agency-in an tan a him lo thei tih an sawi chungin kumin kum tir atangin an rama awm Myanmar mi 10,000 chuang an thawn kir tawh tih a sawi.
Anwar-a hian Thawhlehnia parliament thutkhawmah tam tak hi Myanmar sorkarin thlawhna a ruahmansak hmanga thawn haw an ni a, ram pahnihte inremna siam angin mi 1,500 erawh kar liam ta khan thawn haw an ni tih a sawi bawk.
Anwar-a hian dikna chanvo humhalhtu leh rorel khawl member-ten an thawn kirte, a bik takin Rohingya Muslim-ten tihduhdahna leh hrehawm an tuar thei nia an sawina chhangin Myanmar thuneituten a kirte chungah hian engmah chutiang an ti dawn lo tih an tiam niin a sawi.
“Myanmar nen hian an khua leh tui haw tate dinhmun turah chutiang inremna chu kan siam a. Dik takin, tihduhdahna emaw, an dikna chanvo palzutsak emaw a awm lo tur a ni tih chu kan thu dah a ni,” a ti.
Anwar-a hian hemi chungchang hi ‘ni rei lo te hnua’ Kuala Lumpur thlawh tur, Myanmar President Min Aung Hlaing-a nen an sawi dun leh dawn tih a sawi bawk.
Malaysia hian an thawn haw zawng zawngte hian haw an duh niin an sawi a; mahse, UN High Commissioner for Refugees (UNHCR) chuan kar hmasa khan an thawktuten thawn kir turin ‘duhthlanna zalen’ siamsak an ni em tih zawt tura hmuh phalsak an ni lo tih a lo sawi tawh.
Malaysia-ah hian immigration thuneituten an rama dan lova chengte hai chhuah beihpui thlakin kumin mi 50,000 chuan an man tawh.
Rohingya-te chu Malaysia-a Myanmar raltlan tam ber leh inhumhimna zawng tam ber an ni a, thawn haw zingah hian heng mite hi engzat nge tel tih erawh hriat a ni lo.
UN-in a chhinchhiah dan chuan Malaysia-ah hian Myanmar atanga raltlan 1,93,000 chuang an awm.
Malaysia hi UN Refugee Convention-a tel ve lo niin lehkha nei lova an rama lutte chu raltlan angin an chhia ra, raltlan leh inhumhimna zawng 2,15,600 chuang an kawl mek niin UNHCR chuan a sawi.
Myanmar hi Rohingya-te suata puh an ni a. Kumin kum tir khan International Court of Justice (ICJ) chuan he thubuai hi a ngaihtuah tan.
UNHCR leh dikna chanvo humhalhtute chuan thawn hawte hian tihduhdah leh sipaiten indona tamnaah an dah an ni dawn tih an sawi a. Myanmar-ah hian kum 2021-a sipaiten sorkar an paih thlak atang khan tual chhung indona a chhuak mek a ni.
Indona avang hian mi 1,00,000 chuang an thi tawh niin Armed Conflict Location and Event Data (ACLED) project chuan a sawi.