MAMA Awards nomination-ah Jimin leh Tomorrow X Together an langsar

2023 MAMA Awards nomination an puang a, BTS member Jimin leh Tomorrow X Together an langsar ber a, nomination pariat ve ve an nei. K-pop khawvelah BTS huhang a lian hle a, a group angin che chhuak tawh rih lo mah se ha award nomination-ah hian an group member pathum chu best male artist-ah nominate an ni thawt bawk.
Tomorrow X Together hi an hla ‘Sugar Rush Ride’ leh ‘Goodbye Now’ chu song of the year-ah nominate a ni ve ve bawk.
Jimin hi lead artist angin category panga-ah nominate a ni a, category pathum-ah midang a feature-na avanga nominate a ni ve thung a, a hla ‘Like Crazy’ leh Taeyang a feature-na ‘VIBE’ te chu category pahnih- song of the year leh best dance performance male solo-ah nominate a ni ve ve bawk.
BTS hi group angin che chhuak tawh rih lo mah se an huhang a la lian hle a, an member Jimin, Jung Kook leh V te chu best male artist-ah nominate an ni a, he category-ah hian Lim Young Woong, Parc Jae Jung leh Taeyang te nen an lang ho a ni.
TWICE chu best female group-ah nominate an ni a, an member JIHYO chu best female artist-ah nominate a ni bawk.
Khawthlang lam zaithiamte pawh category hrang hrangah nominate an ni a, Latto chu Jung Kook a feature-na ‘Seven’ avangin nominate a ni a, J. Cole leh Nile Rodgers te pawh J-Hope ‘on the street’ an feature-na avangin nomination-ah an lang a, Anne-marie pawh (G)I-DLE member MINNIE a feature-na ‘Expectations’ avangin nomination-ah a lang bawk.
MAMA Awards hi K-pop-ah chuan chawimawina sang bera an neih niin, November ni 28 leh ni 29 zan hian Tokyo Dome, Japan-ah an sem dawn a, award hi category chi hrang hrang 20-ah sem a ni dawn a, category pakhatah hian nomination panga leh paruk vel zel a awm bawk a ni.