Mamawhtute hnenah hmanrua hlan

Artificial Limb Manufacturing Company (ALIMCO) leh Mizoram State Commissioner for Persons with Disability (PwD) tangdun buatsaih, kum upa leh mahnia chet sawn kawnga rualbanlote hnena an hmanraw mamawh (aids and appliances) chu Thawhlehni khan sem chhuah a ni.
Hmanpuitu Social Welfare, Women & Child Development minister Lalrinpuii chuan, PwD commissioner office leh ALIMCO hmalakna chu ropui a tih thu leh, a bikin PwD commissioner office chu thawktu tlem te ni chunga Mizorama rualbanlote tana a hnathawh chu fakawm a tih thu a sawi a. Mizorama RPWD Act 2016-in rualbanlote hamthatna hrang hrang a tarlan, a taka kenkawh kawngah, mipui vantlanga inzirtirna kalpui leh rualbanlote a taka an chhawmdawlna zawng zawngah chhuanawm a tih thu a sawi.
PwD commissioner office hmalakna nena inmil tak ALIMCO lamin an kalpui chu lawmawm a tih thusawiin, ALIMCO-in mi harsa zawkte thleng phaka mamawhtute hnena hmanraw changkang tak tak a thlawna an sem chu thil ropui tak a ni tih a sawi bawk.
ALIMCO hi Kanpur khawpuia hmunpui nei, sawrkar laipui hriatpuia din pawl changtlung tak, India ram hmun hrang hranga rualbanlohna chi hrang hrang neite mamawh bungrua leh hmanraw pawimawh siam thin a ni a. An hmanraw siam hi a mamawhtute hnenah man loin an sem chhuak leh thin a ni.