Manchester City in Bayern an sawp

April 11, Thawleh zan atang khan UEFA Champions League (UCL) quarter-final khelh tan a ni a. Manchetser City chuan Etihad Stadium-a an mikhual Bayern Munich chu si thum faiin an sawp a, semi-final an hnaih. Bayern an hneh tum hian Erling Braut Haaland chuan goal khat a thun a, record thar a siam. Inkhel dangah Lakaku goal thun hmangin Inter Milan an chak ve bawk.
City in semi-final an hnaih
Europe a club lian, player tha tak tak kawl khawm a, an tualchhung league-a champion ve ve Manchester City leh Bayern Munich te inhmachhawn tur hian ngaihven a hlawh a. An inkhel a chak zawk zawk hian champion theihna hun tha an neia ngaih a ni. Inkhel ngaihven hlawh takah Manchester City an che ropui a, si thum fai ngawta an chak vangin quarter-final thawh khatna chu beisei phak lovin a tawp. PSG hnawtchhuaktu Bayern hian an mualah inlehthalna lian thlentir tumin tan an khawh zui leh ang.
EPL champion City hian an mualah an khel tha viau a, goal pawh an thun har lutuk lo. Minute 27-naah Bernard Silva siamsak atangin hmahruaina goal a thun a. He goal hmang hian si khat faia hmahruai chungin chawlhlawk an hmang.
Chawlhlawk hnu lamah City an khel tha leh zual a, goal hnih an thun belh. Minute 70-naah goal hmahruai siamchhuaktu Bernardo Silva chuan Haaland siamsak atangin goal a thun a, an hmahruaina a tizau.
Si hnih faia hma an hruai hnuin City an khel tha zual sauh a, goal pawh an thun leh thuai. Minute 76-naah defender John Stones siamsak atangin Erling Haaland chuan an goal thumna thunin an chakna a nem nghet. Inkhel hmuhnawm tak hi goal dang luh belh tawh lovin a tawp a. Manchester City chuan si thum faia hnehna changin semi-final an hnaih ta kuarh a ni.
Champions League season kal mekah goal 11 thuna top-scorer ni mek Haaland hian nipui bazar inhawn laia a zawm Manchester United tan inelna hrang hrangah goal 45 a thun tling de tawh a, EPL reocrd thar a siam. EPL tia hming thlak a nih hnuin EPL player zingah season khata goal thun hnem ber chu goal 44 ve ve thuntu Rud van Nistelrooy leh Mohamed Salah te an ni a. Season tawp fel hmain kum 22 mi Haaland chuan Nistel Rooy leh Salah te record siam hi a khum fel der tawh a. Record siam nan game 12 zetin a mamawh tlem zawk nghe nghe. Haaland hi EPL tia thlak hnua player zingah season khata goal thun hnem ber chu a ni tawh ngei a. English Top-flight a nih laia record erawh a la phak lo viau thung.
Haaland hian EPL record thar a siam bakah season khata goal a thun hnem ber tum a tawng bawk. Kum 2019-20 season kha season khata goal a thun tam ber tum niin goal 44 a thun a. Hemi season hian club pahnih; Borussia Dortmund (28) leh Salzburg (16) tana goal a thun belhkhawm 44 a ni a. City tan season khata goal 45 a thun hmangin ama record a khum ta chiah bawk. Goal thun tur renga piang ni mai awma mawi Haaland hian goal dang thun belhin, record khum harsa zawk a hnutchhiah ngei tura ngaih a ni.
Thawhleh zana UCL quarter-final inkhel dangah Italian Serie A club lian Inter Milan chuan Estádio da Luz, Lisbon-a an hmachhawn Benfica chu si hnih faiin an hneh a, semi-final an hnaih ta viau bawk.
Inter Milan tan hian minute 51-naah Nicolò Barella chuan hmahruaina goal a thun a. Hun tawp dawn hnaih minute 82-naah Romelu Lukaku chuan penalty atangin goal a thun ve bawk.