Manchester United mikhual tur Chelsea

Kar laihawlah Champions League-a inkhel hmuhnawm tak tak kan en hnuin kar tawpah inkhel hmuhnawm tak a awm zui leh dawn a. Manchester United in Old Trafford a Chelsea an mikhual tur chu inkhel ngaihven hlawh zual zinga mi a ni. Chelsea lakah United in fiahna hautak an hmachhawn tur hi manager Reuben Amorim tan fiahna, a hma lam hun thui tak hril theitu tur a ni dawn bawk.
Inrinni zan 10-ah Chelsea hmachhawn tur Manchester United hi season tharah an chetha lova, EPL-ah vawi li khel tawhin vawi khat an chak a, draw vawi khat an neih bakah tlawm zawkah vawi hnih ngawt an tan tawh. Khelh li atangin point li chauh an la hmu a, table-ah 14-na an ni mek. EPL-a an match hnuhnung berah an elpui lian Manchester City an ngam lo viau a, Etihad Stadium-ah 3-0 ngawtin an tlawm. An match hnuhnung berah an mualpho vangin an boruak a hniam viau a, sawisel pawh an hlawh nasa hle. City laka an mualpho vangin an manager Reuben Amorim dinhmun a him lo thar nia ngaih a ni. Chesea an hmachhawn tur hi Amorim an fiahna lian a tling thei dawn. Chelsea lakah an chak a nih chuan United enkawl zui turin a dinhmun a him zui thei ng a. An mualah ngei Chesea ngam lova an tlawm a nih erawh chuan a dinhmun a derthawng leh zual ang a, ban a tawh zui mai rinna lian tak a awm. United pian Amorim hi November thla hmaa an ban a nihchuan pound maktaduai 12 ngawt zangnadawmna an pek a ngaih dawn vangin an ban mai erawh rin lohna lian tak a awm ve bawk.
Kum 1992-93 hnu lamah EPL a bul an tan chhiat ve hun tawng mek United hian Chelsea an hneh a nih chuan hmasawnna lam tluang an zawh tanna a ni thei thung.
Old Trafford a lenglut tur Chelsea hi EPL an khelh hnuhnung berah Brentford nen 2-2 in an inhnehtawk a, an chak zo bik lo. EPL 2025-26 ah vawi li khel tawhin vawi hnih an chak tawh a, draw vawi hnih neiin tlawm an la nei lo va, point 8 hmuin pa ngana an ni mek. United an hneh a nih chuan inrintawkna sang zawk an nei thar ngei ang. United leh Chelsea hian inkhel hmuhnawm an lanrit ngei a beiseiawm.