Manipur-a AR lambunaa bultumtu leh ralthuam tam tak man

Manipur-a AR lambunaa bultumtu leh ralthuam tam tak man
Kar hmasa Zirtawpnia Nambol, Manipur-a Assam Rifles lambunnaa sipai pahnih thihna leh panga hliam an tawrhnaa a bultumtu ber nia hriat chu man a ni a, chhuina kal zelah ralthuam thahnem tak hai chhuah a ni bawk.
Thawhlehni hma takah khan District Police Imphal West, Bishnupur Police leh 33 Assam Rifles-ten a huhova beihpui an thlaknaah kum 47 mi, Keilal tia an koh bawk, Khundongbam Ojit Singh-a hi an man a. Amah hi Awang Leikinthabi Awang Leikai, Imphal West-a cheng a ni.
Singh-a hi venhim hna thawktute hriat hlawh sa a ni a. Dan pawna awm mek, People’s Liberation Army (PLA)-a tel thin niin helnaah a inhnamhnawih nasa hle a, kum 2007 pawh khan man a ni tawh.
Tuna an man hnua thu an zawhnaah September 19-a Sabal Leikai-a sipai lambunnaah khan a tel ngei thu a sawi a. Hel pawlah a la tel reng thu leh beihna an kalpui dan kimchangte pawh a sawi a, Assam Rifles sipaite an kah zawhah khan Loktak Lake huam chhungah an tlan chhiat nghal thu pawh a sawi.
Singh-a an dawpna atang hian beihpui thlak zui lehin ralthuam thahnem tak man a ni a. Ralthuam hai chhuahte hi high-caliber rifle pali – A4 rifle, HK rifle leh AK-series rifles pahnih; venhim hna thawktute hman thin INSAS rifle, an ruk emaw, an chhuhsak emaw ni ngeia rin pakhat; rifle chi hrang hrang magazine 14; silaimi chi hrang – AK mu 147, M16 mu 216 leh INSAS mu 67; lathode shell pathum; mi mal thil – mobile phone, wallet leh Aadhaar card te a ni.
Police hotu pakhat chuan Singh-a man a ni leh ralthuam hai chhuah hi chhui hna an thawh meka puitu pawimawh tak a ni tih a sawi a. “Rinhlelh ber man a ni hian chhui zui tur tam tak min hrilh a, hmun hrang hrang dap chhunzawma lambunaa tel dangte pawh um zui zel an ni,” a ti.
September 19-a Assam Rifles sipai beihna kha Bishnupur district-a thleng niin Manipur pumah venhim hna thawktute an inralrin phah hle a. Thawktu pawl hrang hrangte thawhhona nen a titu nia hriat langsar ber man a ni ta a ni.
Manipur-ah hian May, 2023 atangin Kuki leh Meitei inkarah buaina chhuakin mi 260 chuang an thi tawh a, baihvaiin mi sang tel an la awm bawk a. Boruak sa zual reh tawh mah se buaina neuh neuhin a la tuam reng a ni.