Manipur-a exam thei lote Mizoramah

Chawlhni kha UPSC buatsaih Civil Services Examination (CSE) Prelims exam ni a ni a, Manipur-a Zo hnahthlakte chu Aizawl centre-ah an exam.
Manipur-ah chi leh chi inkarah buaina a chhuak a, Zo hnahthlakte tan Imphal-a zin ngam chi a ni lo. An exam a ngai si a, Aizawlah an exam ta a ni.
Aizawl-a exam-te hi zirlai 39 an ni a, mipa 32 leh hmeichhia pasarih an ni. Zomi Students Federation hruaitute’n an kalpui a ni.
Aizawlah hian MZP-in an lo dawngsawng a, MZP hruaitute hian thuneitute hnenah an dinhmunte an thlen a, thlenna tur nei lo mi 26-te chu thuneitu lamin MLA Hostel-ah an thlentir a ni. Mi dang chu an chhungte leh hmelhriatte inah an thleng.
Zirtawpni-ah Aizawl an thleng a, Chawlhni-a an exam zawhah mahni khaw lam panin an kir leh tih thu dawn a ni.
Mizoram chungah an lawm a, harsatna an tawh laia Mizoramin a lo puih avanga an lawmzia leh Mizoram mipuite nena unau an nih a chianzia te an sawi.
Zirna lama kal an nih avangin politics leh thil dang an hriat thuk loh thu te an sawi a, mahse Manipur-ah dinhmun harsa taka an din mek thu te sawiin, chutah chuan theihtawp an chhuah ve thu te an sawi a, Aizawla cham pawh an chak a, mahse an khuaah an thiante an hah em avangin kir thuaia an thiante puih an duh thu te an sawi. Chawlhni-a an exam zawhah an haw leh nghal a ni.