MANIPUR-A MITE BORUAK

By Tluanga Chhakchhuak
Manipur State hi kan hriat theuh angin Mizoram hmar lama awm an ni a, North East India-a State pakhat niin an khawpui chu Imphal a ni a. Khawchhak lamah Burma ram nen ramri intawm neiin thlang lamah Assam state a awm thung a. Manipur State zau zawng hi Mizoram State ang vela zau 22,327 Sq-Km a ni a.
Manipur awmzia chu Sanskrit tawng chuan Lunghlu awmna ram Jewelled Land tih a ni a. Tun hma deuh kha chuan Manipur hi Kangleipak tiin an ko thin a. |henkhat chuan Meiteileipak tih pawhin an ko bawk thin.
Historian Sanamahi Laikan chuan kum zabi 18-na vel khan a hun laia an lalpa Meidingu Pamheiba hun lai, kum 1724 vel atang khan Kangleipak tih kha Manipur tiin a thlak tiin a ziak a. Ani hi an pi pu sakhua atanga Hindu sakhuaa lehtirtu a ni a.
A rama cheng tam zawk hi Meitei tia hriat an ni a, Shan hnam chuan Kasay tia an koh laiin Kawl kan tih mai Burma ho chuan Kathay (Ka Te) tiin an ko ve thin a, Assames ten Mekiee tiin an ko thung a ni.
Kum 1762 khan British East India Company sipai te leh Meitei lal Meidingu Chingthan khomba nen inremna an neih lai khan he ram hi Meckley tih a la ni a, a hnuah British hovin an pawisa thir an siamsaknaah Manipureshwar tiin an chhutsak a, tichuan Meckley tih hming pawh hi a reh hlen ta a, Manipur tihin an ko ta a ni.
Manipur ram phaizawl hi tlang 9-in a hual vel a, tlang ram hi ngaw pik chhah tha tak a nih avangin tun hma chuan Sai, samak, Savawm , Keipui, Keite, sakhi leh sazuk te a tam hle a, kan pi pute ram chhuahna a ni thin. Phaizawl chinah hian Imphal khawpui a awm a, phaizawl hual veltu tlangte a sang hlawm hle a, sea level atangin feet 10,000 vela sang a awm laiin a tlangpuiin feet 5000 -6000 bawr vel a ni a. Chu tlang sanga hnar nei Runlui hi khawchhak Zofate chenna ram Chin State kal tlangin a luang a, Zofate hmuh phaka lui sei ber a nih avangin “Bei ngei sei sei, Run dung” an lo ti thin a ni.
Burmes-ho chuan Run lui hi Manipur-a River an ti thung a, Falam leh Tedim khua bulah a luang a, Falam bula Run Lei chu “Var Bridge” an tih laiin Tedim bula Run lei erawh “ManSaung Bridge” an tithung a. Run lui chu Chin state chhungah a luang tlang zel a, Tahan, Kalaymyo bul a thlen chinah Myinttha (Mit Ta) Lui a fin a; tichuan, hla vak lovah Chhindwin Lui a fin leh a. Chu a finna lai chu Runkhawm tiin an ko thin a, chu hmun chu Kalaywah (Ka Li Wah) lawngchawlhna hmun a ni a. Chindwin lui hi chhim lamah a luang zel a Zofate lunglai luahtu Airawh lui an tih thin Burma rama lui lian ber leh sei ber Irrawaddy lui a fin ta a. Meitei-ho chuan Chindwin Lui hi an la rawn neitu zel a ni.
Manipur rama cheng a tam zawkte hi Meitei an ni a, Manipur ram luah hmasa te an nih avangin Manipuri tiin an ko thin a. A ram luah hmasatu han tihah hian kan pi pu te ho nen tuan leh mang atangin an lo chen dun tawh thin a, kan vaiin Sino- Tibetan langauge bul thut hmang kan ni a. Mongolia ram atanga thlang tla, he ram ruak zau tak rawn luah tlang vek kan ni a. Manipur ram hi Meitei hnam chauh ta bik leh ram a ni lova, a nawlpui chuan a tam ber tihtheih an ni a, mihring cheng zawng zawng 53% hi chu Meitei an ni a, Naga hnam chi peng hrang hrang 24% vel leh Zofa hnam chi hrang hrang Chin-Zomi, Mizo-Kuki thlahten an luah ve bawk a ni.
Kum 2011 chhiarpui atanga hriat dan chuan Meitei nawlpui deuh thaw hi Hindu sakhaw be mi niin Muslim te pawh an awm nual a. Meitei-ho hi an pi pu sakhua SANAMAHI hi an kal bosan ta a, tun hmaa an Pathian hming chu Alingkok, Asheeba, Apanba leh Pakhangba, Leimarel Sidabi, Imoinu , leh Phouoibi te an ni a. Keiniin Pi pu Mizo sakhua Muchhip Pathian, Pu Vana kan biak thin ang hi a nih hmel.
Vai rama Hindu-hoin an lo bum a, an lehkha mahni puala hawrawp an neih thin pawh an Sanskritize-sak a, an pi pu sakhua kalsanin Hindu sakhua an vawn tlat tawh avangin keimahni angin Mongoliod thlah Tibeto Burman Family group ni mah se, an nunphung erawh chu an Vai hle mai a ni.
Keiniin Hmar, Ralte, Pachuau, Sailo, Lai, Mara kan neih angin anni pawh chipeng, Clan hrang hrang an nei ve a, Mangang, Luwan, Khuman, Angom, Moirang, Khangamba, Sarang, Leishangthan te an ni a. Keini Zofate angin mahni chibing hnam tawng chungnung zawk tumin an phili buai ve lova an vaiin Manipuri “Meitei “an inti vek a.
Meitei tawng hmang Muslim an awm ve tho bawk a, Manipur mipui 8% lai an ni ve tho mai a, Pangal tih chu Meitei tawng chuan Muslim tih a ni a, Meitei Muslim-ho chu Meitei Pangal tiin an ko thin a ni.
Mihring an lo tam takah chuan Zofa Chin -Kuki-Zomi zingah Judaism vuantu Mizo-a inchhal tawh lo, serh tana Jewish min nihsan tak Israel hnam bo inti Bnei Manashe-ho pawh an awm ve tho bawk sia.