Manipur-a Pastor-te thah an nih dan demtu an tam

May 13-a Manipur-a pastor pathum mi kut tuara an thihna leh midang pali an hliamna chungchangah Mizoram-a kohhran, political party leh hnam kaihhnawih tlawmngai pawl-ten pawi an tihna, an demna leh pawikhawihtu man chhuaka hremna pek an duhna thuchhuah an siam.
Council of Churches in Mizoram (CCM) chuan Manipur Kangpokpi district-a kohhran hruaitute chuanna lirthei pahnih lambun a, nunna chan leh hliam awm a, henglai chhehvela chengte thlaphang taka an awm phah chuan hmarchhaka Kristiante thinlung a ti na in, an tawrhpui takzet tih a sawi a. He thil thleng hi an dem takzet a, tharum thawhna chuan mipui tawrhna a siam belh mai niloin, khawtlanga muanna a tiderthawng zel tih a sawi a ni.
‘CCM chuan hmun hrang hranga awm Kristian-ten Manipur-ah remna leh muanna tluantling a awm a theihna turin dil ila, tuna thil thlenga nunna chan leh hliam tuar chhung leh khat bakah Manipur mipui leh kohhran-te a tawrhpui takzet a ni,’ a ti.
Central YMA pawhin Manipur Kangpokpi district, Kotzim leh Kotlen inkara Thadou Baptist Association (TBA) Kohhran hruaitute inkhawmpui hmang haw lam chuanna lirthei lambuna mi pathum – Rev Dr Vumthang Sitlhou, Pastor Kaigoulun Lhouvum leh Pastor Paogoulen Sitlhou kahhlum an ni leh midang pali an hliam chu pawi a tih thu a sawi.
‘Hetianga mi pawisawilo leh sakhaw hruaitute kahhlum an ni hi Central YMA chuan pawi a tiin kan dem takzet a. He thil thlenga mawhphurtuten an phu ang tawk hremna an hmuh ngei theihnan sawrkar laipui pawh hma la turin kan ngen. He thil thleng hian Manipura Zofate himna nasa taka a khawih avangin hriatthiam har kan ti a, Zofate leh hnam hrang hrang inkara remna leh muanna awm hi kan duh a ni, a ti.