Manipur-a ruah leh rial thawkin in leh thlai tichhe nasa

Manipur-a ruah leh rial thawkin in leh thlai tichhe nasa
Manipur hmun hrang hrangah Pathianni khan ruah nasa taka surin rialin a nuai bawk avangin chenna in, thil ding dang leh thlai eng emaw zat a chhia a, hmun hrang hrangah power supply a chhiat phah bawk.
Inrinni zan atanga Pathianni thlenga thlipui tleh hian Bishnupur leh Kakching district-a thlai ding tam tak, zikhlum, be leh bean chinna hmun tam tak a tichhia.
Mihring thi an awm lo niin hriat a ni a. Chief Minister Yumnam Khemchand Singh-a chuan thuneitute chu a tul anga hma la turin a hriattir.
“State chhung hmun hrang hranga ruah sur nasa leh rial tla avanga chhiatna tuar chhungkua leh khawtlang tana an tawrhna tihziaawmna tura hma la nghal turin thuneitute hnenah thupek khauh tak siam a ni,” tiin Khemchand-a chuan X-ah a tar lang.
“Relief team-te chu a hun taka tanpuina pek leh mamawhte hmuh theihna turin an inring a ni a, sorkar chu a tuartu zawng zawngte tan a awm a, thil awm dan hi uluk takin a vil zel dawn a ni,” a ti bawk.
Bishnupur district-a Loktak Lake bul, Moirang Phiwangbam leh Thanga-Ngaram kuaah in a chhe nasa hle tih a chengten an sawi.
Tui thianghlim dil lian ber, Loktak awmna, Bishnupur district hmun tam tak, kawngpui, khua leh buh chinna hmun tam tak chu Pathianni chawhnu dar 01:00 vela darkar chanve chhung vur tlain a delh avangin a chhe hle bawk.
Pathianni vek khan Thoubal district-a Tentha, Kakching district-a Sekmaijin leh Loktak Lake-a khaw tawlh theih, Champu Kangpok-ah pawh hetiang thil hi a thleng bawk.
District thuneitute chuan lo neitute leh pawn lama hnathawkte chu fimkhur reng turin an ngen a, ruah sur nasat hun laia tul lova zin chhuak loh turin an chah a. Mipuite pawh a tul tak tak a nih loh chuan an chenna in chhuahsan lo turin an chah bawk.
Mipuite hi thil pawimawh awmna emergency kit buatsaih turin a ngen a, tui lian emaw, lei min emaw thlenna hmun atanga hla taka awm turin a chah a. Mite chu an chenna in chhehvela thil nghet lote tinghet tur leh emergency a awm chuan district thuneitute hnenah hrilh thuai turin an hriattir.
Pathianni chawhnu khan Odisha-a Mayurbhanj district-a Karanjia chhehvela tornado thawk avangin mi pahnih an thi a, mi 17 aia tlem loin hliam an tuar a, in 100 chuang a chhe bawk niin thuneitute chuan an sawi.
Tornado hi tlai dar 04:00 vel khan National Highway (NH)-220-a khaw hrang hrang a nuai a, darkar chanve vel a awh a, Karanjia block-a Kia leh Kankada khuaah chhiatna a thlen nasa a. A bul hnaia awm Panapasi leh Dumuria khua te pawh a nghawng.
Chief Minister Mohan Charan Majhi chuan State Disaster Response Fund (SDRF) atangin thi chhungte tan ralna Rs. nuai 4 pek tur an ni tih a puang tih Mayurbhanj District Collector (DC) Hemakanta Soy chuan a sawi.
Thuneitute chuan thing leh mau leh electric bante a tlu a, inchung a hawk a, kawngpuia lirtheite pawh a delh chhia tih an sawi.
Hliam tuarte chu Karanjia Sub-Divisional Hospital-ah dah an ni a. Hliam tuar zat hi an la hre thei rih chiah lo.