Manipur-ah chi leh chi karah buaina

Manipur-ah chi leh chi karah buaina
Manipur-ah chi leh chi karah buaina a chhuak a, Zo hnahthlakte leh Meitei an inmu leh ar mek. Churachandpur-ah a intan a, Imphal a kangkai nghal.
Manipur atanga thu dawn danin, Nilaini-ah buaina chhuakah Churachandpur-ah Zo hnahthlak mi paliin nunna an chan a, hliam tuar an awm nual bawk.
Tun tum buaina hi hun engemaw chen a inmun hnuah April thla tawp lamah a rawn irhchhuak a, April ni 28 khan Churachandpur-ah buaina a lo chhuak tawh.
Manipur sorkarin Churachandpur district, Kangpokpi district leh Chandel district vela Zo hnahthlakte awmna hmun hrang hrang chu reserve forest area-ah puangin hma a la a, hei hi Meitei-in an ram chhuhsak an tumnaah ngaiin Manipur-a Zo hnahthlakte hi an lawm lo hle. Hei hi kum hmasa lama lo inup tawh a ni a, chi leh chi inkara boruak duhawm lo thlentu ber pakhatah ngaih a ni.
Meitei-te hian Scheduled Caste (SC) ni lova Scheduled Tribe (ST) nih an tum a, hei hi Manipur-a Zofate leh Naga te’n an duh lo hle. Hei hi tlang mite tilungawi lotu pakhat a ni.
April ni 28 khan Churachandpur-ah Manipur chief minister Biren Singh-a’n open gym hawn a tum a, forest reserve area leh SC leh ST chungchanga Biren Singh-a sorkar laka lungawi lo Zo hnahthlakte’n hei hi an duh loh avangin chief minister pawh hian a thulh a ni. Open gym hawnna hun an hmang ta tho a, mipui tel tur an awm lo ang tih hlauvin sorkarin sorkar hnathawkte a kal luihtir a, hemi tum hian mipui leh venhim hnathawkte an intibuai a ni.
May ni 3 khan Manipur sorkar laka an lungawi lohna lantirin All Tribal Students’ Union, Manipur te’n district tinah kawng an zawh a, ralmuanga kawng an zawh hnuah thil duhawm lo a thleng ta a ni. Thudawnna pakhat chuan Meitei lam an che hmasa a ti.
Thu dawn danin, kawng an zawh hnu, mipui an la tin fel hmain Churachandpur daia Anglo Kuki War Gate chu Meitei nia hriatte’n an hal a, a chhehvelah chi leh chi inkarah buaina a chhuah nghal bakah hmun dang a kangkai ta a ni.
Rei lo teah Imphal a kangkai a, Ningani khan Churachandpur lam chu an buai zui lo; Imphal lam erawh an buai zui a, a hma ni aiin an buai tih thu dawn a ni.
Churachandpur atanga thu dawn danin, Imphal lamah hian Meitei-in Zofate an bitum a, Kristian biak in thlengin an tichhia a ni. Ningani tlai lam thleng khan Imphal leh a chhehvelah biak in 24 vel tihchhiat a ni a, minister (kuki) chenna in pawh an bei.
Churachandpur leh a chhehvelah Zofate chuan Zo hnahthlak hrang hrang an tanrual thu leh an inpumkhat thu an sawi a, Imphal lamah pawh an tangrual a, mahse inzawmkhawma inpuih dan tur leh tan tlan dan tur an nei rih lo nia an hriat thu an sawi.