Manipur-ah Kuki hmeichhe pahnih that, Naga in panga hal
Manipur-ah Kuki hmeichhe pahnih that, Naga in panga hal
Mi tu tih hriat loh ralthuam kengten Manipur-a Kuki hmeichhe pahnih chu Thawhlehni khan Tamenglong district-a Muktakhan khuaah an that leh tih police-in an sawi a. Hemi hnu lawk, zan lamah Kangpokpi district-a Naga khua, Chawangkining-ah Kuki hel nia rinten in panga an ve bawk.
Police chuan chawhnu dar 3.30 velah Kaimai Police Station atanga khawthlang lam km 55 vela hlaah hmeichhe pahnih hi kah hlum niin an sawi.
“An ruang hmuh a nih hnuah Silchar Medical College & Hospital, Assam-ah zanah thawn nghal an ni,” tiin Kaimai police chuan an sawi.
Officer-te chuan a titute hriat an la nei lo va, man tumin an zawng zui nghal tih an sawi.
Kuki pawl, Kuki Inpi Manipur (KIM) chuan National Socialist Council of Nagaland–Isak-Muivah (NSCN-IM) leh Zeliangrong United Front peng, Kamson faction (ZUF-K) miten lova hna an thawh laiin an kap hlum niin an sawi.
“Vawiin nena ni thum liam ta chhungin Kuki paruk thah an ni ta a. An lova an feh lai chu NSCN-IM leh an thawhpuiten rawng takin an that a ni,” an ti.
KIM hian pawisawi lo civil mi bitum leh thuneituten an venghim zo lo chuan an state chu chhe takah a chhuah mek tih an sawi a. Sorkar laipui leh state sorkar chu hetiang a thlen tawh loh nan leh civil mite himna atana rang taka che tur leh a titute pawh rang taka man chhuah an duh thu an sawi.
Kuki-Zo pawl dang, Kuki Zo Council (KZC) pawhin khawtlang pawl zawng zawng hnena hriattirna tichhuakin, “Manipur-a Naga helten Kuki-Zo an thah reng reng thu leh awm hma chu phum loh tur a ni a. Ruangte chu Kuki-Zo Council-in tih dan tur a puan hma chu a remchang cold storage-ah dah rih tur a ni,” an ti.
Police chuan Chawangkining-a tharum thawhna thleng hi thubuai ziak lutin eng pawl mahin an tihah an la chhal lo thung a. Khuaa mi, Daniel Charenamai-a chuan ralthuam tha tak tak keng Kuki helten zan dar 10.30 velah khua hi luhchilhin Nilaini zing dar 5.00 velah an chhuahsan chauh niin a sawi.
Kangpokpi district khawpu atanga km 13 vela hla, Chawangkining hi Naga Liangmai khua, Naga leh Kuki khuaten an karcheh a ni a. “Kan khuaah hian Nepali, Mao, Rongmei leh Paomei hnam nen kum tam tak inngeih takin kan khawsa tawh a. Thawhlehni zan khan ralhuam keng mi 100 vel lo kalin kan in leh dawr panga vel min halsak a ni,” a ti.
Venhim hna thawktuten an che lo nia sawiin, “Tu nge kan dem ang? Venhim hna thawktute lo che chhuak tur an awm lo va. Kang thelh turin zingah an lo thleng a, kan khua a himna turin security force post siam turin kan lo ngen a ni,” a ti.
Mi chengte chuan Naga village guard-ten a titute hi an lo bei let a, thi leh hliam erawh an awm lo.
Pathianni zan pawh khan Tamenglong-a Khedaghar-a Naga in kalsan tawh pali hal a lo ni tawh bawk a. Heng inte hi hnam hnih intihbuaina kara Kuki-ten phuba an lak hlauva tlanchhiatsante an ni.
Pathianni khan Tamenglong district-ah hian nupa telin mi pali thah an ni a, mipa naupang kum ruk miin hliam a tuar bawk.
May 3, 2023-a Meitei-Kuki-Zo buaina a chhuah hnuah kumin February 7 atang khan Ukhrul district, Litan-a zu rui inkara buaina chhuak atangin Naga leh Kuki inkara buaina a chhuah belh.
May 13 khan Kangpokpi leh Noney district-ah inlambunna hrang thlengin kohhran hruaitu pathum telin Kuki pali leh Naga mipa an thi a, hei hian Naga leh Kuki hnam inkara buaina hi a tisosang zual.
Hemi ni vek hian hnam hniha mi 48-te chu an inruk bosak tawn a. A hnu thla khatah an zavai lo deuhvin an inchhuahsak a; mahse, Naga mipa paruk chu a hnuah Kharam Vaiphei (Kuki khua) bulah an ruang chhe tawh tak hmuh a ni.
Hemi hnu atang hian Naga leh Kuki chenna khuaah inbeihna a thleng zui ta fo a ni.
Hindustan Times chuan February thla atang khan hnam hniha mite hi mi 30 vel an thi tawh niin a tar lang.
Manipur-a district 16 zinga phaizawla mi panga hi Meitei chenna deuh bik a ni a, a bak zawng hi Naga leh Kuki-Zo chenna a ni.
Senapati, Ukhrul, Kamjong leh Tamenglong hi Naga chen tamna niin Churachandpur, Pherzawl leh Kangpokpi-ah Kuki-Zo an tam deuh va. Chandel leh Tengnoupal-ah hnam hnih hi an inchen pawlh thung.