Manipur-ah political leader 12 in Congress zawm

Manipur-ah political leader 12 in Congress zawm
Manipur-ah political leader 12 in zirtawpni khan Congress party an zawm a, an zingah hian MLA hlui pahnih an tel.
Congress Bhavan-a lawmluhna hun an hmannaah hian chief minister hlui leh veteran politician Okram Ibobi Singh, state congress president Keisham Meghachandra Singh leh Lok Sabha member (Congress) Angomcha Bimol Akoijam-te chuan member tharte hi lo lawmin, hun an lo hmanpui a ni.
Lawmluhna huna thusawitu CM hlui Okram Ibobi Singh chuan BJP rorelna hnuaiah mipuiten hrehawmna leh buaina nasa tak an hmachhawn nia sawiin, Manipur mai ni lo, ram pumah buaina a tam phah hle thu a ti.
BJP thuneihna chan hnu hi chuan rampumah buaina hlirin hmun a chang a, sakhua leh culture chungchangahte, tawng leh nunphung thlengin boruak duhawm lo a thleng reng, a ti bawk.
Manipur chhungah ngei pawh BJP in sorkar na an chan miau avangin an hmalakna tam tak a hlawhchham thu CM hlui chuan sawiin, an ramchhungah buaina lian tak a chhuak a, mi tam tak, pawisawi lo tam takin an tawrh phah thu a sawi zui bawk a ni.