Manipur BJP MLA 44-ten sorkar siam inpeih

Manipur BJP MLA 44-ten sorkar siam inpeih
Manipur-ah politics boruak inthlakna lian tak thlengin BJP MLA, minister hlui ni bawk, Thokchom Radheshyam-a chuan Nilaini khan ‘an party MLA 44 zawng zawngten’ mipui duh angin sorkar siam an duh vek tih a sawi a; mahse, thutlukna chu an party hotu lawkte thu thu a nih thu a sawi.
Thokchom-a hian MLA dang pakuate nen Nilaini khan Governor AK Bhalla chu Imphal-a a chenna, Raj Bhavan-a an hmuh hnuah sorkar siam turin MLA-te an inlungrual thu hi a sawi a ni.
“MLA 44-te hian mipuite duh angin mipui sorkar din an duh vek a. MLA-te hian sorkar siam pawh an inpeih a. Hemi chungchang hi governor hnenah pawh hian kan sawi a. Hei hi a taka tihhlawhtlin dan tura kal zel dan turte kan sawipui a ni,” tiin Thokchom-a chuan thuthar lakhawmtute hnenah a sawi.
Governor hmaa inlan MLA 10-te hi MLA dang zawng zawng aiaawha kal an ni tih a sawi bawk.
“Governor pawh hian a hnena kan thlente hi a lo ngai pawimawh hle a, mipuite tana tha ber turin thil kalpui zel a ni ang,” tiin Heirok bialtu MLA chuan a sawi.
BJP MLA-ten engtikah nge sorkar an siam theih thu an thlen dawn tih zawhna chu Thokchom-a chuan a laipui lama an party hruaitute thutlukna siam ang zel a nih tur thu a sawi.
“National party kan ni a. Tuna ka sawi ang khan sorkar kan siam turin kan inpeih a ni tih hi kan sawi a ni mai a. Speaker pawhin mi malin MLA-te kawmin MLA-te pawh kan inhmu khawm tawh a. Tumah sorkar diam dodal zawngin an awm lo,” a ti.
Mipuite chuan hun harsa leh khirh tak an tawng mek tih a sawi.
“Sorkar hun hmasaah khan Covid avangin kum hnih hloh a ni tawh a, tunah hian kum hnih chu buaina avangin hloh a ni leh bawk,” a ti.
Chief minister hlui, N Biren Singh-a pawhin Thawhlehni khan governor hi a lo hmu tawh bawk.
Manipur atanga BJP Rajya Sabha MP Maharaja Sanajaoba Leishemba-a chuan tun thla tirah khan thla hnih lo awm leh tur chhungin mipui sorkar din leh a nih tur thu alo saiw tawh a. Politics hruaitute chu an state-in harsatna a hmachhawn mekah inlungruala bei let turin a lo sawm tawh a ni.
“President’s Rule ringawt hian kan buaina hi a ching fel thei danw lo va. Tuna chi leh chi inkara buaina kan neih mek chin felna tur atan mipui sorkar a ding tep a ni,” tiin thuthar lakhawmtute hnenah a lo sawi tawh.
BJP Northeast In-charge Sambit Patra pawhin tun thla tir khan an state-a Kangpokpi leh Churachandpur district-te tlawhin Kuki BJP MLA pahnih, Vungzagin Valte leh Nemcha Kipgen te a kawm.
Kipgen-i hi Biren Singh-a sorkarah khan hmeichhe minister awm chhun a ni nghe nghe.
Manipur hi May, 2023 atanga Meitei leh Kuki-Zo inkara buaina chhuak avangin an buai a. Kumin February 9 khan Biren Singh-a pawh chief minister atangin a bâng a, February 13-ah President’s Rule-ah dah niin kum hnih hun la nei assembly pawh hna thawk thei rih lova dah nghal a ni.
Chi leh chi inkara buaina chhuakah hian mi 200 chuang thi awm tawhin mi sang tel baihvaiin an la awm phah mek.