Manipur BJP MLA-ten mipui sorkar din dan tur sawiho
Manipur BJP MLA-ten mipui sorkar din dan tur sawiho
Manipur chief minister hlui, N Biren Singh-a chuan BJP MLA-te chuan an state-a muanna a awm leh theihna tur leh mipui sorkar din leh theihna tur an ngaihtuah tih Pathianni khan a sawi.
“Mipuiin harsatna an tawh mek leh kan state chhung ngeia mahni in luah ngam lova tlanchhiaten hun khirh tak an tawh mek chungchang kan sawi ho va. Kan state party president chuan BJP MLA thutkhawm a ko va, tun hnai lawk khan Delhi-ah ram puma kan hruaitute a lo kawm tawh bawk a ni,” tiin Singh hian BJP state headquarters-a an thutkhawm zawhah thuthar lakhawmtute a hrilh.
An sawiho lian ber chu mipuiin an duh anga mipui thlan sorkar din leh chungchang leh an state-a muanna a awm leh theihna tur a nih thu chief minister hlui hian a sawi.
Singh-a hian tun hnaia vantlang huap pawlten union home ministry an dawr chu lawmawm a tih thu sawiin ‘bul tanna tha tak’ a nih thu a sawi.
“Mipui huap pawl – AMUCO, COCOMI leh FOCS ten ministry of home affairs an bia kha tha ka ti hle a, bul tanna tha tak a ni a. Kan Kuki unaute pawh an kal tih ka lo hria a, MLA-te pawh an inpeih tih kan tilang tawh a, muanna a awm leh ngei ka beisei tlat a ni,” tiin February-a chief minister atanga bâng, Singh-a chuan a sawi.
State BJP chief A Sharda Devi-i pawhin, “Thingpui in ho pahin kan thukhawm a, tun hnaia ram pum huapa kan hruaitute kan kawmna kan report a. A hma atang tawhin mipuiin mipui sorkar an duh tih kan hriat chu kan thlen a, tun hnaia Gwaltabi-a sorkar bus-a state hming inziak thai reh chungchang pawh kan sawi ho va. Tun thleng hi chuan sorkar laipui atangin hnialna kan la dawng rih lo,” tiin an party hotu lawkte an dawr chungchang a sawi.
Sharda-i chuan MLA pariat vel an tel lo tih a sawi a, ‘thenkhat chuan thu an rawn thawn a, thenkhat erawh thutkhawmna hmun atanga hla taka awm an ni’ tih a sawi.
BJP MLA 22 chuang an tel a, an zingah hian Speaker Th. Satyabrata Singh-a pawh a tel.
Hmarchhak state-ah hian May, 2023 atang khan chi leh chi inkara buaina chhuakin mi 260 chuang an thi tawh a, mi sang tel baihvaiin an awm phah mek.
Sorkar laipui chuan chief minister atanga Singh-a a bân hnuah February 13 khan President’s Rule-in a dah zui a. Kum 2027 thleng hun la nei, state assembly pawh hna thawk thei rih lovin a siam a ni.