Manipur boruak rit, kawngpui dang chhunzawm zel
Kuki leh Naga pawlten an state châk lak luhna kawngpui, National Highway 2 an la dan avangin Manipur-ah chuan nunphung a buai phah chhunzawm zel.
Kar kal ta Nilainia inlambunna thleng leh tlangram hmun eng emaw zat atanga civil mi eng emaw zat ruk bo nia sawi a nih hnua kawng hi dan niin truck leh lirthei dang za tam tak chu kawngpui pawimawh takah hian an tangkhang mek.
United Naga Council (UNC) chuan Naga chenna bial hrang hrangah district inkalpawhna dan a nih thu a puang a, pastor tela Naga civil mi paruk ruk bo nia an sawite chu vawi tam vawi tam tak ngenna leh zawn a nih nuah pawh an chin hriat a la ni lo tih an sawi a. Thuneitute chu mi bote him taka an kir leh theihna turin hma an la lo niin an puh.
Hetih lai hian Kuki Inpi Manipur (KIM) chuan kawngpui an dan mek chu darkar 48 dang an pawtsei leh a, Senapati district-a mi bo, Kuki mi nia an sawite chu sorkarin chhanchhuah a tum lo niin an sawi a ni.
Thuang hniha kawngpui danchah hian buaina nasa tak tawk mek state-ah harsatna a tizual a, inkalpawh, ni tin mamawh lak leh NH 2-a bungraw phurh harsatna lian tak a awm.
Thuneitute chuan Nilaini kal taa Kangpokpi district-a Kotlen leh Kotzim inkar, Zero Point bula kohhran hruaitu pathum lambuna thah an nih hnuah boruak a tang zual hle niin an sawi a. He thil thleng hian thinurna nasa tak a siam a, hun rei tak hnam inkara buaina chhuak tawhah inrintawn lohna a tizual thar hle.
Sorkar thuchhuah tar lan danin hriat dan hmasaah chuan tharum thawhna thlen lai hian mi 38 chuang an bo va, a hnuah mi 32 chu him takin an kir tih an sawi a, bo la awmte zawn chhuah tumin hma an la chhunzawm zel bawk.
Hetihlai hian venhim hna thawktute chuan Churachandpur leh Kangpokpi district-a hmun hlauhawm hrang hrangah mi zawn leh dap chhuah hna nasa takin an kalpui a, hei hi he biala hel pawl nia rinhlelh an awm tih thu an dawn vang a ni.
Churachandpur district-a Henglep-ah chuan venhim hna thawktu dah belhin inralrinna tihchak a ni a, Kangpokpi district-a Leilon Vaiphei leh Kharam Vaiphei khaw bul tlangdungah pawh mi zawn hna hi thawh a ni bawk.
Hmun danga beihpui thlaknaah venhim hna thawktute hian Imphal East district-ah dan pawna awm firfiak pawl, People’s Revolutionary Party of Kangleipak-a tel nia sawi an man a. Laishram Jivan Singh (38) hi Heingang Police Station huam chhunga Khabam Lamkhai Makha Leikai-ah man a ni.
Venhim hna thawktu pawl hrang hrangten thil thlithlai, mi zawn leh hmunhma luaha an awmchilh chhunzawm zel avangin tlangram hmun hlauhawm zual bikah pawh pawl hrang hrang tanghova beihpui thlakna lian zawk kalpui a ni thuai thei nia sawi a ni.
Harsatna nasa zual zel karah hian India hmarchhak-a Council for Baptist Churches leh Manipur Baptist Convention aiawh kohhran hruaitute palaite chuan Imphal-ah Chief Minister Yumnam Khemchand Singh-a an hmu a, buaina kara palai hna thawk turin an inpe.
Kohhran team hrang hrang pahnihin Kangpokpi leh Senapati district tlawhin vantlang pawl hrang hrang, kohhran hruaitute leh a tuar chhungkua te nen remna chungchang sawihona neih beisei a ni a. State puma buaina tihziaawmna tura hmalak chhunzawm zel a nih avangin team-te hian mi hrangtute chu an mi rukte chhuahtir turin an ngen dawn bawk.