Manipur boruak sawi phal lo MADC Session-ah eptute chhuak

Mara Autonomous District Council Fur Thutkhawm ni hnihnaah eptu lamin Manipur Zohnahthlakte harsatna chungchang House-a sawiho an dilna chairman-in a hnawlsak avangin House an chhuahsan a, an tel lo hian thutkhawm hi neih zawh a ni.
MADC hotute sawi danin, Nilaini khan Fur Thutkhawm hi MADC Session Hall ah neih chhunzawm a ni a, Session kaihruaitu, chairman N Viakhu chuan eptu lam atanga Manipura Zohnahthlakte harsatna thleng chungchang sawihona motion a luh thu sawiin, CCB Rules-ah session tan hma ni hnih hmalamah motion hi putluh tur a nih avangin hnawl a ni tih a sawi.
Eptu lamte hian chairman thuneihna a ni, tiin, sawiho phalsak ngei turin an phut a. Chairman-in a remtih loh avangin eptu lam – Congress leh MNF MDC te chu lungawiloin House an chhuahsan a. Zawhna leh chhanna pawh hmang loin chawhma dar 10.45 khan chawhma session tihtawp a ni.
Chawhnu dar 2.00 ah session hi chhunzawm a ni a, eptu member-te an tel tak loh avangin ruling lam hian Thawhlehnia Bill leh Rules putluh chu an pass a, chairman hian chawhnu dar 2.25 ah tiamchin awm loin Session hi a titawp
Eptu MDC-te hian Siaha-a thuthar thehdarhtute hnenah House atanga an chhuah chhan leh an tel zui tak loh chhan an sawi a. BJP sawrkar MADC hotuten BJP sawrkarna thil sawichhuah tum chu an huphurh avanga motion putluh pawh hi pawm duh lo leh remtih sak lo nia an ngaih thu an sawi.
MNF MDC Legislature Party leader Nahlo Solo chuan Manipur-ah Zohnahthlak mipuiten nasa taka an tawrh lai leh in leh lo chan a, biak in tam tak tihchhiat leh rawng taka inthah leh sawisaka an awm mek lai leh, Mizoram pumah kan unaute tawrhpuina kawngzawh neih a nih laiin, MADC Session lai nen a innang a, Manipur chungchang hi reilote, darkar chanve lek kan unaute tawrhrpuina thu sawiho phuta motion an putluh chairman-in a hnawl ta mai chu an hrethiam lo tih a sawi.
An motion putluh hi CCB Rules 34-na behchhana siam, chairman thuneihna liau liau a ni, “List of bussiness-ah a tel lo, tih leh, session tan hma ni hnih talah a luh hman a ngai, tia chhuanlam siamin motion hi hnawl a ni a. List of business chu Business Advisory Committee siam a ni a, motion erawh englai pawha lut thei, chairman thuneihna, pawma pawm loh theih a ni a. Manipur hi BJP sawrkar a nih avang leh central-ah BJP a sawrkar bawk avangin MADC BJP sawrkar hian he motion hi sawiho an duh ta lo nia kan ngai,” Nahlo Solo hian a ti.
Congress MDC James Riatha bakah MDC dangte pawhin motion an putluh chhante sawifiahin, Manipur-a Zohnahthlakte tawrhpuina thu House-a sawiho chu Zohnahthlakte leh MADC tan pawh thil tha tak a nih avanga rawt an ni a, bussiness dang pawh tibuai loa session tha taka kal chhunzawm mai tura an beisei lai a, sawiho an phal loh avangin Session-ah Bill leh Rules an thehluh pawh sawiho pui tlakah an ngai bik loa, an chhuahsan ta, tiin an sawi a ni.
Session chhung hian ziaka chhan chi zawhna pali chu House dawhkanah dah a ni a, kaa chhan chi zawhna 8 chhan a ni. Official Bill pahnih leh Official Rules 5 pawm a ni.