Manipur buai hnu-ah ganja kawng thar

Manipur an buai a, an buaina hian ruihhlo lamah pawh nghawng a nei a nih hmel; Mizorama ganja luh kawng ni thin kha a tawp rih nia ngaih a ni. Mizoram Excise & Narcotics department hotute sawi danin, Manipur buai hnuah Manipur atanga Mizorama ganja lut thin kha a tawp niin a lang a, tun hnaiah Manipur atanga Mizorama ganja lut man tur an hmu lo.
Manipur hi Mizorama ganja luhna lian a ni a, Mizoram ganja hi a that loh avangin Manipur atangin a lut thin. Tun hnaiah erawh chutiang a ni ta lo niin an sawi.
Ganja luhna kawng a inthlak a, Tripura atangin Mizoramah tun hnaiah ganja a lut ta thung. Mizoram Excise & Narcotics department hotute chuan Tripura atangin Mizoramah ganja a lut tawh tih an sawi a, tunah rih chuan hei hi Mizorama ganja luhna ber a ni an ti.
‘Tripura-ah hian ganja a tam a, an rawn lakluh pawh uluk taka sawngbawl a ni tih a hria,’ MEN department hotu pakhat chuan a ti.
Manipur atanga lut kha chu thlai hnah tel ang deuh a ni thin a, Tripura atanga lut hi chu bawm tha pangngai taka thun, uluk taka ‘compress’ a ni tih a sawi.
Tripura atanga Mizorama ganja lakluh hi a man pawh a to an ti a, Manipur atanga lut kha Kg-ah Rs 3000 te a nih laiin tunlaia Tripura atanga lut hi chu Kg-ah Rs 8000-10000 te a nih thu an sawi.
Tripura atanga Mizorama ganja laluttute hi hnam dang an ni a, Mamit leh Kanhmun kaltlangin motor-in ganja hi an rawn keng an ti.
Ganja hi MEN department hian kuminah May thla thleng khan Kg 110.344 an man tawh a, ganja vangin mi 35 an man tawh.