Smart City project hnuaiah Police pui thei tur camera vuah

India sawrkarin ramchhung khawpuite tih hmasawnna tura a duan – Smart City project hnuaia kalpui, Aizawl khawpui dunga mihring leh lirthei chetvelna fiah taka hmuh theihna chu bun zawh fel a ni a, hman theih a ni tawh.
Smart City hnuaia hmalakna hrang hrang zing ami Integrated Command and Control Centre huangah hian Aizawl khawpui hi, Melthum Silaimuala Trinity Hospital atanga Durtlang thlengin, khawpui dung luh leh chhuahna hmun 76-ah camera 237 vuah a ni a, camera hi a inanglo nuk thung. Khawpui dunga mihring leh lirthei chevel hrim hrim lakna, mihring bik lakna leh lirthei bik (motor registration telin) lakna a awm hrang bawk. Heng hian fiah takin darkar 24 chhung thla a la reng a, thlalak hi ICCC hmunah a khawl tha zel a, ni 25-30 chhung chu a khawl tha a ni.
He thil hi a bikin, police (traffic police telin) a pui thei hle dawn tih Aizawl Smart City Limited hotute chuan an sawi a. Chutihrualin, mahni duh duh lai en ngawt theihna a ni dawn loa, dan leh inkaihhruaina fel tak hnuaiah, hnuchhui tul bik thilah, zawm tur fel tak siam chungin hman theih a ni chauh dawn tih an sawi.
Heng zawng zawng buatsaihnan hian cheng vaibelchhe 100 vel a kal niin an sawi.
Aizawl Smart City Limited hotute chuan Thawhlehni khan Smart City kum 8 tlin pualin Aizawl Smart City Mission hnathawh thenkhat chu tualchhunga thuthar thehdarhtute an tlawhpui a. Project 41 thawh tur awmah tunah hian 6 zawhfel a ni tawh a, a dang 37 hi la thawh mek a ni.