BMI Icon-ah Lil Wayne an puang dawn

2023 R&B/ Hip-Hop Awards September ni 6-a sem turah Lil Wayne chu BMI Icon Award hlan a nih tur thu an puang a, he private hi BMI President leh CEO ni bawk Mike O’Neill leh BMI vice president, Cetherine Brewton ten an host tur a ni a, LIV Nightclub, Miami Beach-ah neih a ni ang. He event-ah hian hip-hop rimawi kum 50 tlin lawmna hun an hmang tel nghal dawn bawk a ni.
Brewton chuan thuchhuah siamin, “Hip-hop legend leh superstar a nih angin Lil Wayne tih leh he genre hi chu a kalkawp tlat tawh a ni. 2002 atang khan BMI chhungkuaah a tel tawh a, a hming lo chher tawhna leh artist zinga huhang nei lian berte zinga mi a nih avang te hian BMI Icon-a kan puang hi awm kan tihliah hliah a ni. Hetihrual hian hip-hop kum 50 tlinchampha lawm theia kan awm hi kan phur hle bawk a, he genre hian entertainment, fashion, sports leh thildangah nghawng a nei lian hle a ni,” a ti.
BMI Icon award hi Janet Jackson, Patti Labelle, Nile Rodgers, Snoop Dogg, The Jacksons, LA Reid, Babyface, Al Green, Isaac Hayes, James Brown leh Busta Rhymes te pawhin an lo dawng tawh a ni.
Lil Waye hian Billboard 200 (albums) chart-a No.1 kai thei album panga a nei tawh a, Tha Carter album pathumna, palina leh pangana te No.1 an kai vek a, 2010-a a labum ‘I Am Not a Human Being’ leh 2020-a a album Funeral te pawh No.1 an kai ve ve a ni. Billboard Hot 100 (singles) chart-ah pawh No.1 kai thei hla pathum a nei tawh a, ‘Lollipop’ (featuring Static Major) bakah Jay Sean a feature-na ‘Down’ leh DJ Khaled a feature-na ‘I’m the One’ te chu No.1 an lo kai tawh bawk a ni.
Lil Wayne hian 2009 khan Grammy Award pali a dawng a, chung zingah hian Tha Carter III avangin best rap album a dawn leh ‘Lollipop’ avanga best rap song a dawn te pawh a tel. 2017-ah a Grammy Award panganan Chance the Rapper a feature-na ‘No Problem’ avangin best rap performance a dawng leh bawk. Tunhnaiah The Recording Academy Honors Presented by The Black Music Collective-ah global impact award a dawng tawh bawk.
BMI Awards-ah pawh Lil Wayne hi a mikhual tawh lo hle a, he award hi 52 a dawng tawh a, 2008, 2009, 2011 leh 2013-ah te khan R&B/hip-hop songwriter of the year a dawng a, 2009 khan BMI London Awards-ah ‘Down’ avangin college song of the year a dawng tawh bawk. BET Hip-Hop Awards pawh 15 dawng tawhin, BET Award 11, Billboard Music Awards pali, Soul Train Awards pali leh MTV Video Music Awards pahnih a dawng tawh bawk.