Manipur buaia thuneitute ‘ngawi’ hrethiam lo

Senior Congress leader Jairam Ramesh chuan buainain a nuai mek Manipur chungchangah Centre na takin a sawisel a. Ramesh chuan northeastern State chu ‘a kang mek’ tiin a sawi a, Prime Minister Narendra Modi “a ngawi reng a”, Home Minister Amit Shah ‘awmze nei lo’ niin Chief Minister N. Biren Singh chu ‘non-functional’ tiin a sawi bawk.
Ramesh hian Harkishan Singh Surjeet Bhawan a Manipur chungchangah national convention on peace neihnaah thusawina a nei a, political party hotu rualte hmaah thu a sawi a ni.
A hnuah Ramesh chuan Manipur State-a political, administrative leh humanitarian disaster chungchanga ngaihdan sawihona party hrang hrang 10 tena an neihah a tel zui bawk.
“Lungrual vekna a awm thei lo a nih pawhin inrawnkhawmna a awm thei a ni. Chu chu Constitution of India siam a nih dan pawh a ni a. Inrawnkhawmnaa thutlukna siam hmangin mi tin te thu leh hla ngaihthlakin Manipur-in inrintawnna siam leh theih a ni a. Hun a duh rei dawn a. Kar khata thleng mai thei a ni dawn lo va, a thla a thla, a kum a kum ngai tur pawh a ni ang,” tiin Congress general secretary in-charge communication chuan a sawi.
Manipur a kang mek a, Prime Minister a ngawi hmak a, Home Minister in awmzia a nei lo va, Chief Minister ber pawh ‘che thei lovin a awm a ni’ tiin a sawi bawk a. Ramesh chuan Chief Minister chu thlak nghal tur a ni, a ti a.
Thil pawimawh tak pahnih tih nghal ngaiin a awm a – thleibikna nei hauh lovin armed group tin te khuahkhirh tur a ni a, chumi hnuah inrintawnna, remna leh inngeihna a awm theihna tura hmalak tur a ni, tiin a sawi bawk.
Ramesh chuan Manipur Chief Minister hlui Okram Ibobi Singh chuan kum 10 lai thil mumal a awm theih nan hma lain hmasawnna a intan dawn chiah lai a ni, a ti a.
“Keini chuan Manipur India rama ‘unitity through diversity’ example tha berah hian a rang thei ang bera thil pangngaia a kal leh kan beisei a ni,” tiin a sawi bawk.
A hma lawkin Congress te chuan Chief Minister N. Biren Singh kaihhruaina hnuaiah Manipur-ah remna a awm thei lo tia sawiin Prime Minister chu a rang thei ang bera thlak nghal turin an ngen a ni.
Home Minister Amit Shah-an Parliament building-a all-party meeting a kohah eight-point character demand siamin an ngaihdan dik tak te sawihona leh sawina hun tam zawk pek an ni thei lo chu pawi a tih thu a sawi bawk.
Manipur buaina avang hian mi 120 dawnin nunna an chan phah tawh a, mi 3,000 chuangin hliam tuar tawhin May 3 atanga intan kha a ni a. Meitei leh Kuki community te inbeihnaah chenna in tam tak hala awmin chenna in nei lo tam tak an awm mek a ni.