Manipur buaina leh Centre

Manipur buaina chuan thla hnih zet a awh ta; tun thlengin ziaawm lam pan thei lovin inthahna a la thleng reng a. Tun hnaia rawng taka Meitei lam chetna chuan boruak a ti sosang leh sawt a; tun dinhmunah chuan remna leh muanna a awm theihna tura hmalakna kawng pawh a pin phah leh sauh dawn a ang leh ta hle.
Khawvela democracy ram lian ber India ram chhung state pakhata chengte inkara hetiang inbeihna rapthlak tak thlengin thla hnih zet a awh ta leh, tun thlenga ziaawm lam pan ahneha a la punlun reng mai hi, buaina tih rehna tura hmalakna kawngah sawrkar laipui (Centre) lamin tha an thawh nep hle a tih theih.
Buaina a chhuah hlim ni hnih thum chhung bak kha chu, a hnu lama buaina thleng chhunzawm zel tur hmeh mih mai theiha a lan laiin, state sawrkain engmah a ti thei lo va, inthahna, inrawkna, chenna in leh sakhaw biak in tam tak halralna a thleng chhunzawm ta ngar ngar a. Mahni state chhungah pawh awm ngam lovin thenawm state-ah mipui sing chuang an tlanchhia a, heng zawng zawng hi Centre chuan a hre vek a.
Thla khat deuhthaw hnuah, union home minister-in zan thum zet riah chilha a rawn tlawh hnuah pawh, buaina hmeh mih theih a la ni lova. Tunah chuan thla hnih a pumhlum leh ta a, Manipur sawrkar hian dan leh thupek a kengkawh thei hlawl tawh lo tih a chiang hle tawh.
State sawrkarin a ram chhunga buaina thleng a thunun thei lo va, mome minister ngei pawhin a hmunah a rawn riah chilh tawh bawk a, chuti chung chuan buaina hian zual lam a pan deuh deuh emaw tih turin a awm hi Centre mualphona a ni tel tawh. Hetiang dinhmun tawhah hi chuan Centre lam pawhin President’s Rule hi a puan hnan ngei tawh tur a ni dawn lom ni, tih chu mi tam tak ngaihdan a ni a, PR puang tura Centre ngentu pawh thahnem tak an awm mek reng bawk.
Tuna a lan danah hi chuan, Manipura Meitei leh Tlangmite hi tunhma anga rorelna pakhat hnuaia khawsa tlang zui leh thei tur niin an lang tawh lo va, eng ber emaw inrelbawlna hrang deuh hi chu a pian chhuah a ngai tawh dawn niin a lang a, ngai an awh tawh dawn lo niin a ngaih theih. Hnam hrang hrang lungrual taka chenhona ‘unity in diversity’ ram kan nihna chhuang taka ram hruaitu hmasaten an lo sawi thin ang kha, sawi ngam a ni tawh lo mai ang tih a hlauhawm hle; Centre lam an inrawlh thuk a pawimawh ta hle a ni.
Hetih lai hian, he buainaa a tuartu Zohnahthlakte thlavang hauhna thawm hi, Mizoram sawrkar pawh hian tun aia ring deuh zawk hian han auchhuahpui leh se; buaina ti reh tura tun aia nasa zawka hma la tur te pawhin sawrkar laipui lam pawh kan sawrkar hian han au ve leh se, pawn lam atanga thawm lo neihpui reng hi a sawt ngeiin a rinawm a ni.