Manipur Group YMA leh HYA in chhiat tawkte pui

Tunhnaia Mizoramin Cyclone Remal avanga chhiatna a tawh avangin chhiatna tuartute tan Manipur Group YMA, Hmar Youth Association Gen. Hqrs. Manipur leh Zofa pawl dangten puihna an hlan.
Manipur Group YMA hruaitute hian an group huamchhunga vehbur an khawn atangin Rs. 4,07,630 chu Central YMA hnenah an hlan a. Hemi pual thoa Zomi Youth Association leh Zomi Mother Association vehbur khawn tlingkhawm Rs. 3,04,321 bakah Zou Youth Association vehbur khawn Rs. 1,97,847 chu an aiawhin Central YMA hruaitute hnenah an hlan sak nghal a ni.
HYA Gen. Hqrs. hian ‘HYA for Mizoram’ tiin social media kaltlangin vehbur an khawn a, HYA Branch leh Welfare thawhkhawm cheng nuai thum chu Chief Minister Relief Fund atan chief minister Lalduhoma hnenah an hlan. Central YMA hnenah Rs. 1,30,000 an hlan bawk.
HYA hruaitute hian Sinlung Hills Council CEM Lalvenhima Hmar chu a office-ah an kawm a. HYA founder president Lala Khawbung, leh C Thant Khawbung te pawh an kawm a ni.
An ni bakah hian CM Relief Fund-ah Wesleyan Methodist Church of Mizoram Rs. 50000, Mizoram Pharmacist Association Rs. 50000, ZPM Gen Hqrs. Rs. 67000, Mamit Central Block ZPM Thalai Rs. 10000, Kawnpui VC-III Rs. 10000, Ramthar Unit-II Zonu Rs. 10000, All Mizoram MGNREGA Staff Federation Rs. 50000, Delhi Chin Communities Fellowship Rs. 21000, Chalfilh Constituency Rs. 41501, Music Domain Mizoram Rs. 113500 leh Buannel Sumo Counter Rs. 15000 ten sumfai an hlan bawk.