Manipur thil thlengin rilru ti na

Supreme Court chuan Manipur-a zothnahthlak hmeichhia pahnih saruaka Meitei rual tena hual vela an kaltir lai thlalak chu na taka sawiselin constitution hlawhchhamna tihialin Chief Justice of India Dy Chandrachud chuan a sawi a. Sorkar chu rang taka hma la tur leh an hmalak dan hrilh hre nghal turin a ti bawk.
Sorkarin chet a la lo a nih chuan tia sawiin Chief Justice chuan Court chuan July 28-ah chet lain a ngaihtuah zui ang, a ti bawk.
“Nimin lama video hmuh hrehawm zet mai khan min tihrehawm takzet a, kan ngaihtuah taket a ni. Sorkarin chet a lak a hun a, pawm theih a ni lo,” tiin Chandrachud chuan a sawi.
“Sorkarin hma a la lo a nih chuan keinin hma kan la ang. Sorkarin a hmalak dan court hnenah a hrilh hre nghal zel tur a ni bawk a. Media a pholan thil duhawm lo tak hi constitution bawhchhiatna nasa tak a ni,” tiin Chief Justice chuan a sawi bawk.
He video-ah hian hmeichhia pahnihte chu Meitei misual ten saruaka parade tirin a thenin an taksa an khawih bawk a, a hnuah pawngsual an ni bawk tia sawi a ni.
He thil thleng hi May 4-a Kangpokpi district, Imphal atanga 35 km vela hlaa thleng a nih thu Indigenous Tribal Leaders’ Forum (ITLF) te chuan an sawi a.
He video thehdarh a nih hnu lawkah Manipur police te chuan meizanghlaptu ber tia an sawi kum 32 a upa Heradas chu an man tawh thu an sawi a. Video a T-shirt hring ha kha a ni.
Video-a lang hmeichhe pakhat zawk hi pawngsual niin FIR chuan a tarlang a. Hmeichhia hringtu pa leh a unaupa te chu Meitei mob ten an tihlum bawk niin an khua hotu chuan a sawi bawk a. A unaupa mipa tleirawl kum 19 leka upa chu Meitei te laka a u chhan a tumna lamah thah niin a sawi.
FIR-a tarlan dan chuan mi panga an zinga hmeichhia pathum te chu an nunna atana hlauhawm tiin ram ngaw lamah an tlanchhia a, police ten an chhanchhuak a. A hnuah Meitei mi 900-1000 vel te chuan police kut ata chhuhsakin an la hrang zui tiin tarlan a ni.
He video hian India ram pumah thinrimna nasa tak thlen nghalin Manipur buai tirh ata tawngkam khat pawh sawi duh lo Prime Minister Narendra Modi pawhin sawi a neih phah zui a. “Ka nain ka thinrim takzet a ni,” tiin PM Modi chuan a sawi a. Ngaihdam theih loh tia sawiin dan hmanga hmalak niin thil tisualtu chu hrem a ni ang, a ti bawk.
Opposition party lian tin hruaitute chuan thuchhuah nei vekin Manipur-a tribal hmeichhia pahnih chunga thil thleng chu na takin an dem thu an sawi vek hlawm a. Parliament Monsoon Session-a sawiho ngei an ngiat bawk.
Union Women and Child Development Minister Smriti Irani pawhin Manipur Chief Minister N. Biren Singh a biak nghal thu sawiin thil thleng chu a dem thu a sawi bawk a. Thil tisualtute chu hrem ngei an nih tur thu a sawi bawk.
Congress te chuan Centre chu May 4 video avanga na taka sawisel nghalin Narendra Modi sorkar chu engkim a tha vek e tia engtia rei nge an ngawih reng dawn tiin zawhna an siam bawk a. Hei mai bakah hian eng hunah nge Manipur Chief Minister N. Biren Singh chu thlak a nih dawn tiin zawhna an siam bawk.
All India Majlis-e-Ittehadul Muslimeen (AIMIM) chief leh Lok Sabha MP Asaduddin Owaisi chuan Prime Minister Narendra Modi chuan Manipur-a tribal hmeichhia pahnih laka thil thleng avangin loh theih lohin Manipur chungchang sawi lo thei lova siamin a awm phah tiin a sawi a. Hei mai bakah hian PM Modi chu thil thleng chu CBI te ngei chhui chiantir tura a phut tlat thu a sawi bawk