Manipur tlangram district-ah ralthuam tam tak hai chhuak

Manipur Police chuan tlangram district-a beihpui an thlaknaah venhim hna thawktuten ralthuam 87 an man thu Ningani khan an sawi.
Thuchhuah an siamah police hian an ralthuam man zingah hian venhim hna thawktuten an hman thin, US siam M16 rifle leh Insas rifle pawh a tel a, tualchher silai, Manipur-a Pompi silai an tih mai 28 a tel bawk tih an tar lang.
“Thu kan dawnah hmun hrang hrangah ralthuam, puak thei dang leh hmanraw dang a awm tih kan hriat dap turin tanghovin beihpui thlak a ni a. Churachandpur, Chandel leh Tengnoupal district-ah Manipur Police, Assam Rifles/Army leh CAPF an thawk chhuak a, khaw chhung leh dai dap a ni,” an ti.
Silai bakah grenade 22, lathod bomb panga leh silaimu 20 bakah radio set 23 an hai chhuak tih an sawi.
“Manipur Police hian Manipur hi hmun him leh muanawm a nih theih nan a bei zel a. Mipuite pawh police, Assam Rifles/Army leh venhim hna thawktute puia thil rinhlelhawm deuh an hmuh leh hriata dan lova ralthuam kawl an awm chuan an hnaih ber police station-ah emaw, central control room-ah emaw hriattir thuai zel turin kan chah a ni,” tiin DGP office-in thu a chhuah.
Tar lan tawh thin angin May, 2023 atangin Manipur-ah hian phaizawla cheng, Meitei leh tlangrama cheng, Kuki inkarah buaina a chhuak a, mi 260 chuang thi tawhin mi sang chuang in leh lo chhuahsana baihvai an la awm mek bawk.
Chi leh chi inkara buaina avang hian phal lohva ralthuam kawl leh tawlh a hluar a, buai a zual lai khan police hmun beia ruk chhuah a tam hle bawk a. Hengte hi venhim hna thawktuten um zuiin man chhuah leh hai chhuah an tum mek zel a ni.