Manipur Zofa aiawh leh CYMA inkawm

Tunhnaia Manipur tualchhung buaina avanga Manipur-a cheng Zohnahthlak hnampual pawl hrang hrang intelkhawmna – ‘Indigenous Tribal Leaders Forum’ (ITLF) hruaitute chu an chairman, Pagin Haokip hoin hruaitu mi 17 chuan Central YMA hruaitute an kawm a, CYMA president R Lalngheta hoin an lo dawngsawng.
ITLF chairman chuan buaina an neih tirh atangin YMA hnena an tlukluh hma leh tanpuina an dil hma hauh atangin ‘inpui’ nih tlin takin kawng engkimah tanpuina an hmuh avangin lawmthu a sawi a. Zohnahthlak hnam hrang hrangten unau hmelhai nei tawh thin mah se, Pathian remruat angin tunah chuan an duh emaw duh lo emaw Mizoram mipui kutah an rawn tlulut ta a, inunauna tha tak nen an harsatna tawh mek pawh hi an hmachhawn thei tawh dawn, tih a sawi. An hmalam hun atan kawng tinrengah inpui nghaktu Mizoram mipui tanpuina leh chawmdawlna an ngen tih a sawi a ni.
Central YMA president chuan Manipur-a Zohnahthlak thenkhatte chungah a Mizo leh YMA ang pawhin lawm chiah lohna te pawh lo nei tawh thin mah se, hun kal tawh theihnghilh vekin tuna Zohnahthlak unauten harsatna an tawh mek chu an chunga tla ang tho a ni a, inkuangkuah theihna ban chuan fan tawp a nei theiin a ring lo tih a sawi. Nunau leh tar chaklo zawk rawn tlanthlate nen pawh a thlum a al an ei za zel dawn tih a sawi.