Mara thalai pawl, Mara Thyutlia Py (MTP) chuan Mara hming leh khua lam dan dika lam leh puan, a bikin chanchintharah an beisei tih an sawi.
-- Advertisement --
MTP Gen. Hqrs. hruaitute chuan Thawhtanni khan Raj Bhavan-ah larsap Hari Babu Kambhampati an kawm a. Siaha district huamchhunga mipui tana an ngaihpawimawh hrang hrang bakah raltlan chungchang leh NHIDCL company hnathawhte sawipuiin, Myanmar atanga Siaha district lama raltlanten harsatna an tawhte an sawi a. Assam Rifles duty-te laka harsatna an tawk fo thin chu pawi an tih thu sawiin, hei hi tihtawp a nih theih nan hma lak sak turin larsap hi an ngen.
National highway sial mek, NHIDCL leh BIPL company-te hnathawh MTP Vigilance & Monitoring Cell-in a enpuinaah an duh thu a sam tawk lohnate hrilhin, furpui thlen hmaa mipui tana harsatana thlen loa a nawlpui zawh a nih theihna’n hma lakpui turin an ngen.
District kilkhawr an nih angin mobile service provider-ten service an pek that loh zia an sawi a. Internet mai ni lo, phone call leh message service ah pawh Mizoram puma a harsatna hmun ber nia an rin thu an sawi. Service provider-ten service an pek that tawk loh avanga zirlaite tan harsatna a thlen fo thu te, internet hmanga eizawngtute tan harsatna a tam tawh zia leh Siaha district mipuiin network connectivity tha zawk an thlakhlelh tawh zia thu te an thlen bawk.
Larsap hnenah hian chanchintharahte Mara hming leh khua lamrik kawnga a lam dan dik taka puan a nih thin an beisei tih MTP hruaitute hian an sawi a. Hemi kawngah hian DDK ah te pawh Mara tawng thiam an thawh ve ngai nia an hriat thu an sawi.
Kumin Independence Day 2023 lawmna pui ber Delhi-a hman turah MTP Gen. Hqrs cultural troup “Sawlakia” lam an pholan theihna’n kawng dapsak turin larsap hnenah hian an ngen a ni.