Bharat Sanchar Nigam Ltd (BSNL) leh Bharat Broadband Network Ltd (BBNL) hotute chu Thawhtanni khan larsap Hari Babu Kambhampati chuan a kawm a. Mizoram hmun kilkhawr zawka internet connectivity a awm vek theihna’na BSNL hmalakna leh internet data chak zawka inpekna hrui, fibre to the home (FTTH) thlun hna thawk mektu BBNL thlen chinte an sawi ho.
-- Advertisement --
Larsap chuan BSNL leh BBNL hotute chu sawrkar telecom provider an nih angin hlawkna um lutuk loa, service tha zawk, technology tunlai zawkte Mizoram hmun kil zawka chengte tana chhawp turin a ngen a. An hmalakna tawhnaah lawmthu sawiin, tunah chuan private company-ten telecom service an pek ve tawh avangin BSNL leh BBNL an tan nasat a ngai tih a sawi.
Siaha leh Lawngtlai district bikah internet leh phone network connectivity a chhe zual a, bank lam tan pawh hnathawh ngaihna a awm lo tih sawiin, bank mamawhtu mipuiin an tuar rei tawh a, heng hmunah hian tan la zual a, fibre hmanga internet chak chi pek leh 4G tower kaltlanga 4G internet service pekchhuah kawngah hma la rang turin a ngen.
4G saturation program hnuaia 4G connectivity awmlohna hmun zawng zawnga 4G service pek tura BSNL-in hma a lakna chu tha a tih thu Hari Babu Kambhampati hian a sawi a. Kawngpui awmlohna hmun tlem azawngah tower sakna bungrua lakluh harsatna hmunah helicopter hmanga bungraw thliarluh dan dap turin thurawn a pe bawk.
BSNL hmalakna hrang hrangte hian powerpoint presentation hmangin BSNL leh BBNL hotuten an sawifiah a ni.