Maroon 5 ‘Memories’-in 1B view kai

Maroon 5 ‘Memories’-in 1B view kai
Maroon 5 hian tunkar chu thil lawm tur pahnih an nei. Adam Levine leh a pawlte music video ‘Memories’ chuan YouTube-ah vawi tluklehdingawn en a hlawh ta a, hetihrual hian a video dang ‘Sugar’ chuan YouTube-ah vawi tluklehdingawn 4 chuang en a hlawh ve ta bawk.
‘Memories’ hi 2019-a an tlangzarh kha niin, ‘Jordi’ album ami a ni a, an band manager thin, mual liam ta Jordan Feldstein puala an phuah niin, thian ngaihna hla a ni. An tlangzarh hlimah Billboard Hot 100 (singles) chart-ah pawh No.2 a kai pha a ni. A music video hi David Dobkin direct niin, Levine-a mowhawk leh khabe vel te pawh a close-up shot a langsar thei viau a nih kha.
An music video dang, 2014-a an single ‘Sugar’ pawhin YouTube-ah vawi tluklehdingawn li en a hlawh ta a, he hla hi an album pangana ‘V’ atanga an single niin, Levine leh Mike Posner, Dr. Luke, Jacob Hindlin leh Henry Walter te phuahho a ni a, he hla pawh hi an tlangzarh hlimah Billboard Hot 100 chart No.2 a kai.
A music video hi David Dobkin direct tho a ni a, tu tute emaw mo lawmnaah an inlan thut thutna kha a ni. Los Angeles-a shot a ni a, an car chung khuhna hawn theih chiah chuangin, Los Angeles a mo lawmna hmun hrang hrangah a inneia hriat lawk lem lohin an zai sak thut thut a, a video pawh hi a hmuhnawm viau a ni.
‘Sugar’ hi Maroon 5 music video-ah chuan YouTube-a vawi tluklehdingawn li en hlawh thei hmasa ber a ni a, an video dang, 2018-a an tihchhuah hmeichhe lar hrang hrang an inlanna ‘Girls Like You’ kha a dawttu niin, vawi tluklehdingawn 3.5 chuang en a hlawh tawh bawk a ni.
Maroon 5 hian 2019-a Super Bowl LIII halftime show an headline hnuah hla thar an nei tam ta vak lo a, hemi kumah hian an singles ‘Memories’ an tlangzarh kha a ni a, 2020-ah ‘Nobody’s Love’ an tichhuak a, 2021-ah ‘Beautiful Mistakes’ featuring Megan Thee Stallion tichhuakin, nikum khan an Las Vegas residency kick off nan ‘Middle Ground’ an tichhuak leh bawk. Heng bak hi chu 2019 hnuah hla thar an la nei lo va, album pawh an la khawrpum leh ta rih lo a ni.