MATA Promotional Tour a hlawhtling

Mizoram Amateur Taek-wondo Association (MATA) chuan district association-te’n hma a sawn theihna tur ngaih-tuahin a hmuna tlawhchhuah a, sawipui tha a tih angin June ni 28 atanga ni 30 chhung khan Mizoram Chhimlam district pali – Hnahthial, Siaha, Lawngtlai leh Lungleite an tlawhkual a, MATA thu-chhuah chuan he Promotional Tour hi a hlawhtling hle niin an tarlang.
Karliamta Zirtawpni khan Hnahthial district tlawhin, Hnahthial District Amatuer Taekwondo Association (HD-ATA) secretary Vanlalrema kaihhruaina hnuaiah Hnathiala taekwondo zirna kalpui dan tur ruahmanna siamho a ni a, HDATA president nih lai kumin kumtir lama boral ta PC Vanlalrema sunna leh ralna hun hman a ni bawk.
Zirtawpni vek khan MATA palaite chuan Siaha leh Lawngtlai an tlawh zui leh a; chawhma lamah Siaha DATA president A.Thazi kaih-hruainain district association hmalakna tur hrang hrangte sawiho a ni a, Siaha Taekwondo Academy tlawhin an hmunhma enho nghal a ni.
Chawhnu lamah Lawngtlai District Amatuer Taekwondo Asso-ciation-te nen Lawngtlaiah meeting neihho leh a ni a; he hunah hian taekwondo zirna hmun (Dojang) tihchangtlun dan turte sawiho niin, vice president Lalhmachhuana’n LDATA kalphung a sawi a; LADC chairman VL Hmuaka’n hmanpuiin, LDATA-te tan theihtawp chhuah a tum thu a sawi bawk.
Lawngtlaiah hian colour belt exam buatsaih nghal a ni a, zirlai 12-te’n tha takin exam an paltlang.
Lunglei District Amateur Taekwondo Association hruai-tu Lalthansanga kaihhruainain District Sports & Youth Hall, Lungleiah district taekwondo hmasawn dan tur sawiho leh a ni a; MATA hruaitute nen hian taekwondo training-te enho niin, district mamawh hrang hrang tihhlawhtlin dan tur sawiho nghal a ni.
MATA Promotional Tour-ah hian MATA atangin senior vice president Master VL Sawma, general secretary Master Joseph Thansanga, technical board member Albert Lalrinfela leh Lianthangpuiite an kal a; district hrang hrang atanga player tha an chhinchhiahte chu Mizoram senior leh cadet team atan remchang hmasa bera kohkhawm an tum.