Cheng vaibelchhe tel senna Lengte leh Saitlaw rama chief minister Pu Zoramthanga mau chi tha chinna project chu a hlawhchham lailet der niin Congress Thalai chuan an sawi.
Congress Thalai Hqrs. thuchhuak chuan, MNF returnee-ten mau tiak an phunna hmun – Lengte leh Saitlaw ram chu January 31 khan an tlawh a, heng lai hmunah hian mau puitling hmuh tur a awm lo tih sawiin, ‘A thlawna sawrkar sum luanralna leh sum siamna chiang tak a ni tih kan finfiah a, he project hi a hlawhchham let der a ni tih kan puang,’ a ti.
-- Advertisement --
RTI Act hmanga zawhna Horticulture department chhan danin, mau/raw tiak chi thum phuntir an nih thu te, kum 2020 atangin loneitute hnenah mau/raw tiak 849425 sem a nih tawh thu te, a tiak leina atan cheng vaibelchhe 6.48 an sen tawh bakah link road laihna atan sum engemawzat sen a nih tawh thu te a lang tih Congress Thalai hian sawiin, heti chung hian mau puitling tha pakhatmah Lengte leh Saitlaw ramah hmuh tur a awm lo tih a sawi.
‘Tun hnu ah hetiang project lem, tihhlawhtlin tumna tak tak awm lo hi kalpui ngai tawh lo tur leh sum siam nan maia sawrkar sum hmang tawh lo turin MNF sawrkar hi kan chah a ni,’ a ti.