ZPM a sawrkar a nih chuan an sawrkar atanga ni 100 chhungin Mizoram State Subordinate Services Selection Board (MSSSB) an thiat dawn tih ZPM leader Lalduhoma chuan a sawi.
ZPM Zonu AMC area intuaitharna Aizawla neih a hmanpuinaah Lalduhoma chuan sawrkar hna lak reng rengah MPSC-in dik taka hna a lak theih na’n hma an la dawn a, an thuamchak dawn tih a sawi. “MSSSB hi party mi leh sa induhsakna, uchuak taka hnalakna, thalaite tibeidawngtu a ni. Party induhsakna atana siamchawp MSSSB hi sawrkarna kan siam ve hlauh a nih chuan kan thiah tur thu kan lo sawi tawh thin a. Kan sawrkar atanga ni 100 chhungin kan thiat anga, a tul a nih chuan MPSC kan thuamchak ang,” a ti.
ZPM leader chuan ZPM chuan party sawrkar ni lo mipui sawrkar tak tak din an tum tih a sawi a. Sawrkar sum party tana hman a nih fo chuan hmasawnna tur a tithuanawp dawn tih a chian thu sawiin, “He intihbikna leh thleibikna hian nasa takin mipui rilru a tichhia a. SEDP dawng tura hming ziaklutte an inlawmlut a, taxi permit leh two wheeler taxi permit thlengin party worker tan an ti zel a, hei hian mipui sawrkar ni lo party sawrkar kan hrawn zia a tilang chiang hle,” a ti.
ZPM chu mipuiin an x-ray a, an policy avangin an thlir mek tih ZPM hruaitu hian a sawi a. Mipuiin beiseina sang tak an neih avangin party dang anga an kal a rem ve lo tih a sawi. “Politics hi beisei neiin khelh fuh an tum thin a, keini chuan khelh dik kan tum. MLA fund hi kohhran sum anga hman chuan daihzai tak a ni a, tangkai taka hman theih a ni tih ZPM MLA ten kan lantir mek,” a ti. Ruling nih vanga awm maia engemaw therhlo dawn tawp tumna rilru kalsan a tul, tiin, an ni chuan thawhrimna an zuar tih a sawi bawk.