Mizo hnam sipaite (MNF returnees) Maumual Chaltlang rama chenna in ngaihtuah sak tura din ‘Maumual Development Committee for MNF Returnees’ chu an chairman, Land Revenue & Settlement minister Lalruatkima hoin an thukhawm a. Maumual ram awmna bialtu MLA C Lalmuanpuia pawh a tel.
Minister chuan kum 1986-a India sawrkar leh Mizo National Front inremna thuthlung ziah hnua hnam pasaltha rawn hawte pualin Maumual ram hi theh a ni tih a sawi a. A hmun hi khatih hun lai kha chuan hla deuh leh thlaler deuh anga a lan avangin chenna in sa duh pawh an awm mang lo niin a lang a, tunah erawh chutiang a ni tawh loa, hmun tha leh rem tak a lo ni tawh tih a sawi. Sawrkarin ex-MNA te in leh lo ngaihtuah sak a ngaihpawimawh avangin theihtawp chhuahin hma lak reng a ni tih sawiin, kum 1987 a siam tawh house site plan chu tunlai thiamna changkang zawka siamthat a ni a. Land Revenue & Settlement department chuan surveyor tirin mumal taka survey neiin, plot siamfel a ni a; siamrem ngai la awmte pawh siamrem nghal zel tura hma lak a ni tih a sawi a ni.
Maumual ram theh chu phase hniha kalpui a nih thu leh phase-I ah hian SEDP atangin Rs. 5,00,000 dahin, phase-II kalpui thuai tumin hma lak tan a ni tih Lalruatkima hian sawiin, “Maumual ramah hian khawpui felfai tak din a ni dawn a, mimal ram bakah mipui vantlang hmunhma tur – Anganwadi, school, taxi stand leh tul dangte a awm a, in tin hi kawngpui tha takin a pawh vek dawn a ni,” a ti.
Revenue department-in survey an neih atanga house site plan/ plot an siamte an thlirho a. Ruahman ang chuan July thla chhunga engkim peihfel tum a ni.
Thutkhawma report danin, Maumual huamchhunga ram nei in report zat chu 863 an ni a. Report lut atanga house site plan chhunga awm tih hriat theih 452 awmin, plan chhung ami tih hriat mai theih loh 411 a awm. Plot allotment siam zawng zawng chu 677 niin, plot cancel leh a ram neitute kuta pek 61 a awm a ni.
Maumual ram theh fel hnai
Get real time updates directly on you device, subscribe now.
Prev Post
Next Post