May 1 atangin Myanmar nen inkalpawhna khar vek dawn

India sawrkar Ministry of Home Affairs atanga thu an hmuh angin April thla chhungin Myanmar leh India khua leh tuite darkar 72 chhung inkalpawh theih a ni anga, May 1 atangin inkalpawhna zawng zawng khar a ni dawn tih Assam Rilfes chuan an sawi.
Assam Rifles hotute hian an camp, Darthlalang Tlang Champhaiah ramri daido khua Tlangsam, Zote, Ngur, Ruantlang leh Hmunhmeltha khawtlang hruaitute bakah Sub Headquarters YMA Champhai leh Champhai South leh Champhai North Joint Village Council hruaitute chu Nilaini khan kokhawmin an hmalak dan an hrilh.
Ministry of Home Affairs atanga thu an hmuh angin, Lok Sabha inthlan vuakveta ramri khar a nih hnua ramri khar chhunzawm a nih dan tur an sawi a. April thla chung chu khawngaihna hun (grace peroid) kalpui a ni anga, phalna la in ram pahnih mite darkar 72 (ni thum chhung) an cham thei ang. Engemaw harsatna avanga hun bituk chhung aia rei cham turte chuan duty-te phalna lak hmasak tur a ni a, phalna la lote chungah action lak a ni dawn tih an sawi.
MHA thu angin, May 1 atang chuan Champhai district chhunga Border Haat awmte chu khar a ni dawn tih an sawi a. Harsatna liantham bikah erawh chhinchhiahna fel tak nen inkalpawh theih a ni dawn tih an sawi.
Ramri khar hi Champhai district atanga ruihhlo tawlh nasa lutuk leh Myanmar mi leh sa-in Mizoram kaltlanga ruihhlo an tawlh nasa lutuk danchahna tur a ni pakhat tih an sawi bawk.
Assam Rifles hotute chuan MHA bakah anmahni headquarters atanga thu an hmuh angin lirthei an endik chhunzawm dawn tih an sawi a. Danin a phal loh an phur a nih loh chuan zaidam leh dawhthei taka dawh hram hram turin mipui an ngen. Engemaw thu inhmuh fuh lo awm palh thei a awm tih sawiin, chutiang a lo awm a nih pawhin tharum thawh lo zawnga a chinfel dan dap hram hram turin khawtlang hruaitute hi an ngen a ni.
Sub-Hqrs YMA Champhai rorel inkhawm chuan India leh Myanmar ramri hung a nih lohna turin hma lak nise tiin a lo rel tawh a, hemi bawhzui dan tur hi May 4-ah an sawi ho dawn a ni.