Turkey president chuan May 14 ah an ram parliament leh president thlanna neih a nih tur thu a puang.
President Recep Tayyip Erdogan chuan a chuh leh tur thu sawi nghal bawkin inthlan hun tur hi youth conference neihna Bursa province ah a puang a, a thusawina video hi thehdarh zui nghal a ni.
-- Advertisement --
“Pathian hnenah kan kawng zawh intawm avangin kan thalai hlu tak tak te hian a tum khat nan May 14 ah vote an thlak thei dawn a ni” tiin Erdogan chuan a sawi a.
Bursa a thusawina a neihah hian march 10 ah official in inthlan hun puan a ni ang a, chumi hnuah Supreme Election Council chuan inthlan a buaipui zui nghal ang tiin a sawi.
Candidate in vote 50% chuang an hmu thei lo a nih chuan May 28 ah second round neih zui leh a ni ang a ti bawk.
Erdsogan hi kum 2003 atang khan office a la luah ta char char a, a tirha prime minister niin kum 2014 atang khan president a ni ta char char a. Kumin inthlan hi a hmachhawn huphurhawm ber tura ngaih niin Turkey economy a tha lova inflation a sang nasa bawk.
Opposition party paruk inzawmkhawm te chuan presidential candidate thehchhuah turah thutlukna an la siam lova. He party inzawmkhawmah hian pro-Kurdish party, parliament a party mala lian ber pathumna te chu telh an ni lo bawk a, anni hian a hranin candidate an nei mai thei bawk.
Kum 68-a upa Erdogan hian kum 2018 khan governance system thlak danglamin prime minister post thiatin president in thuneihna zawng zawng a chang deuh vek a. A hma chuan president post chu a hminga awm ve chauh zawk a ni a. System tharah erawh presidential leh parliamentary election chu a ruala neih tur a ni thung.
Opposition-te chuan Turkey economy tlahniam leh civil rights leh zalenna tlahniam zel chu Erdogan vang an ti a, gvernance system a thlak danglam chhan pawh ‘mi pakhat chauh rorelna’ anga kalpui a duh vang an ti bawk. Presidential system hi kum 2017 referendum neihah leh 2018 inthlan hnuah pawm fel a ni.
Kumin inthlan hun hi June thlaa neih tur a ni a, mahse, ruling party member te chuan nipui lai leh religious holiday lai a ni tiin an sawn hma ta a ni.